نیوزی لینڈ نے بھارت کو دوسرے ایک روزہ میچ میں 22 رن سے شکست دے کر تین میچز کی سیریز0-2 ناقابل شکست برتری حاصل کرلی۔

آکلینڈ میں کھیلے گئے دوسرے ایک روزہ میچ میں بھارت نے ٹاس جیت کر نیوزی لینڈ کو پہلے  بیٹنگ کرنے کی دعوت دی تو ٹاپ آرڈر کی عمدہ بیٹنگ کی بدولت  نیوزی لینڈ نے مقررہ 50 اوورز میں 8 وکٹوں کے نقصان پر 273 رنز بنائے۔

اوپنرز مارٹن گپٹل 79 اور ہنری نکلز 41 رنز بناکر آؤٹ ہوئے۔ گذشتہ میچ کے سینچورین راس ٹیلر نے اس میچ میں بھی ناقابل شکست 73 رنز کی اننگز کی کھیلی ۔کائل جیمی سن25 اور ٹام بلنڈیل 22 رنز بناکر دیگر نمایاں بلے باز رہے۔

ان کے علاوہ کپتان ٹام لیتھم 7، کولن ڈی گرینڈ ہوم 5، جمی نیشم اور ٹم ساؤتھی3،3 جبکہ مارک چیپمین ایک رن بناسکے۔

بھارت کی جانب سے یزویندرا چاہل نے 3، شردل ٹھاکر نے 2 جبکہ رویندرا جدیجا نے ایک وکٹ حاصل کی۔

274 رنز کے ہدف کے تعاقب میں  بھارتی ٹیم ابتدا ء سے ہی مشکلات کا شکار رہی اور48.3 اوورز میں 251 رنز بناکر آل آؤٹ ہوگئی۔

ٹیلر کی ناقابل شکست سنچری، نیوزی لینڈ نے بھارت کو شکست دے دی

بھارت کی جانب سے رویندرا جدیجا 55، شریاس ایئر 52جبکہ نودیپ سینی45 رنز بناکر نمایاں رہے۔

ان کے علاوہ پرتھوی شا24،شردل ٹھاکر 18، کپتان ویرات کوہلی 15، یزویندرا چاہل 10، کیدار جادھو9،لوکیش راہول4 جبکہ منیش اگروال 3 رنز بناسکے۔

نیوزی لینڈ کی جانب سے ہمیش بینیٹ ، ٹم ساؤتھی ، کائل جیمی سن اور کولن ڈی گرینڈ ہوم نے 2،2 جبکہ جمی نیشم نے ایک وکٹ حاصل کی۔

آل راؤنڈ کارکردگی کا مظاہرہ کرنے والے کائل جیمی سن کو میچ کا بہترین کھلاڑی قرار دیا گیا۔

اس فتح کے ساتھ ہی نیوزی لینڈ کو تین ایک روزہ میچز کی سیریز میں 0-2 کی ناقابل شکست برتری حاصل ہوگئی ہے۔

دونوں ٹیموں کے مابین سیریز کا تیسرا اور آخری میچ 11 فروری کو ماؤنٹ ماؤنگانوئی میں کھیلا جائے گا۔