وفاقی وزیر ریلوے خواجہ سعد رفیق نے کہا ہے کہ ریلوے کے انتظامی و مالی امور کو ڈیجیٹائز کرنے کا خواب پورا ہونے کو ہے۔

تفصیلات کے مطابق وفاقی وزیر ریلوے خواجہ سعد رفیق نے اپنے ایک بیان میں کہا کہ پاکستان ریلوے کے امور کی ادائیگی میں ایک نئے دور کا آغاز ہوگیا ہے اور اب ریلوے کے انتظامی و مالی امور کو ڈیجیٹائز کرنے کا خواب پورا ہونے کو ہے۔

انہوں نے کہا کہ پاکستان ریلوے کو مینول سے ڈیجیٹائز کرنا نہایت ضروری تھا جبکہ ای آر پی کے استعمال سے کام میں جدت، شفافیت اور براہ راست مانیٹرنگ ممکن ہو سکے گی۔

   ان کا کہنا تھا کہ مسافروں کو جدید سہولیات مہیا کرنے کے لئے اس نظام کی اشد ضرورت تھی، ای آر پی سسٹمز کے ذریعے نہ صرف وقت کی بچت ہو گی بلکہ وسائل کا ستعمال بھی کم ہو گا۔

 سعد رفیق نے کہا کہ اس اقدام کے بدولت پاکستان ریلویز کو بہتر فیصلہ سازی کرنے کا موقع ملے گا اور ریلوے کی آپریشنل کارگردگی میں بہتری آئیگی۔

انہوں نے کہا کہ آمدن و اخراجات کی براہ راست مانیٹرنگ کی جاسکے گی جبکہ ہر قسم کے ٹینڈرز شفاف طریقے سے کئے جاسکیں گے۔

   ان کا کہنا تھا کہ اس سے ملازمین کے سروس معاملات کو بھی بہتر انداز میں پرفارم کیا جاسکے گا جبکہ ریلوے کے ریٹائرڈ ملازمین کے ریکارڈ کو بھی کمپیوٹرائزڈ کر رہے ہیں۔

وفاقی وزیر ریلوے خواجہ سعد رفیق نے مزید کہا کہ پاکستان ریلویز انفارمیشن ٹیکنالوجی کے استعمال میں مسلسل اضافہ کر رہا ہے۔