کوئٹہ: پاکستان تحریک انصاف کے سینیٹر اعظم سواتی کا پانچ روزہ ریمانڈ منظور کرلیا گیا ہے۔

تفصیلات کے مطابق سینیٹر اعظم سواتی کو جوڈیشیل مجسٹریٹ دہم کی عدالت میں پیش کیا گیا۔

پولیس کی جانب سے عدالت سے سینیٹر اعظم سواتی کا 10 روزہ ریمانڈ طلب کیا گیا ہے۔

جوڈیشل مجسٹریٹ عبدالستار نے سینیٹر اعظم سواتی کا 5 روزہ جسمانی ریمانڈ منظور کرتے ہوئے انہیں پولیس کے حوالے کر دیا۔

خیال رہے کہ سینیٹر اعظم سواتی کو تین روز قبل اسلام آباد سے گرفتار کر کے راہداری ریمانڈ پر کوئٹہ منتقل کیا گیا تھا۔

سینیٹر اعظم خان سواتی پر بلوچستان میں 5 ایف آئی آرز کوئٹہ، لسبیلہ، خضدار، ژوب، اور گوادر میں درج کی گئی ہیں۔

سینیٹر اعظم سواتی پر 26 نومبر کو لسبیلہ ، خضدار اور کوئٹہ کی تحصیل کچلاک میں تین مقدمات درج کیے گئے ۔چوتھا مقدمہ 27 نومبر کو گوادر کی تحصیل پسنی میں درج ہوا جبکہ 28 نومبر کو پانچواں مقدمہ ضلع ژوب میں درج کیا گیا ۔

سینیٹر اعظم سواتی پر ایف آئی آرز میں پیکا ایکٹ سمیت 7 دفعات ہیں جن میں دفعہ 109 ، 505 ، 504،  501، 500 ، 153 اور 131 کو بھی ایف آئی آرز کا حصہ بنایا گیا ہے۔

وکیل اعظم سواتی اور قاسم سوری کی گفتگو

اس موقع پر اعظم سواتی کے وکیل اقبال شاہ ایڈووکیٹ نے اعظم سواتی کی پیشی کے بعد میڈیا سے گفتگو کرتے ہوئے کہا کہ جوڈیشل مجسٹریٹ نے سینیٹر اعظم سواتی کو 5 روزہ جسمانی ریمانڈ پر پولیس کے حوالے کردیا۔

وکیل اعظم سواتی نے مزید کہا کہ ایک کیس میں متعدد ایف آئی آر کاٹنا غیر قانونی ہے، غیر قانونی اقدام کیخلاف سپریم کورٹ جائیں گے، میڈیا کو روکنا بھی غیر قانونی ہے۔

دوسری جانب پی ٹی آئی کے صوبائی صدر قاسم سوری نے کوئٹہ کچہری کے باہر میڈیا سے غیر رسمی گفتگو کرتے ہوئے کہا کہ اعظم سواتی کو دہشتگروں کی طرف عدالت میں پیش کیا گیا، ان کو پچھلے گیٹ سے عدالت لایا گیا اور عدالت میں میڈیا کا داخلہ بھی بند کیا گیا۔

قاسم سوری نے کہا کہ عدالت نے پانچ روزہ ریمانڈ پر دوبارہ پولیس کے حوالے کردیا گیا، اس ملک میں آزادی رائے کا گلہ گھونٹا جارہا ہے۔

انہوں نے کہا کہ شدید سردی میں اعظم سواتی کو کوئٹہ لایا گیا ہے۔ اعظم سواتی کے خلاف بے بنیاد ایف آئی آر کاٹی گئی ہیں، سپریم کورٹ کا حکم ہے ایک ہی مقدمے کی کئی ایف آئی آر کٹی ہوئی ہیں۔

پی ٹی آئی رہنما نے مزید کہا کہ اعظم سواتی کی طبیعت ناساز ہے، عمران خان سمیت تمام رہنماؤں پر ایف آئی آر درج کی گئی ہے۔