تحریک انصاف کے رہنما زلفی بخاری نے کہا ہے کہ ای وی ایم نارمل بیلٹ پیپر سے بہت بہتر ہے۔

سابق وزیر اعظم عمران خان کے معاون خصوصی زلفی بخاری نے بول نیوز سے گفتگو کرتے ہوئے کہا کہ ای وی ایم کے لیے بل منظور ہوا انہوں نے اس پر کام نہیں کیا، ان کو ڈر تھا کہ شفاف الیکشن ہوجاتے۔

انہوں نے کہا کہ یہ چاہتے تھے کہ اوورسیز کو اسپیشل سیٹس دے دیں، اسپیشل سیٹس دینے سے اوورسیز کا کردار کم ہوجاتا۔

پی ٹی آئی رہنما زلفی بخاری نے مزید کہا کہ اوورسیز کا ووٹ اتنا ہی قیمتی ہے جتنا ایک پاکستانی کا ہے۔

ای وی ایم کے استعمال سے قبل 14 مراحل سے گزرنا ہوگا، الیکشن کمیشن

چند روز قبل پاکستان کی پارلیمنٹ کی جانب سے الیکٹرانک ووٹنگ مشین کے ذریعے انتخابات کرانے سے متعلق بل پاس ہو جانے کے باوجود الیکشن کمیشن آف پاکستان نے کہا تھا کہ آئندہ انتخابات ای وی ایم پر ہوں گے یا نہیں اس حوالے سے ابھی کچھ نہیں کہہ سکتے۔

سیکرٹری الیکشن کمیشن عمر حمید خان نے اپنے بیان میں کہا تھا کہ الیکٹرانک ووٹنگ مشین کا استعمال آئندہ عام انتخابات میں ہوگا یا نہیں، ابھی کچھ نہیں کہہ سکتے۔ ای وی ایم کے استعمال میں چیلنجز درپیش ہو سکتے ہیں۔

انہوں نے کہا کہ قانون سازی کے باوجود آئندہ عام انتخابات میں ای وی ایم کے استعمال سے پہلے 14 مراحل سے گزرنا ہوگا، جن میں خاص طور پر ای وی ایم کے استعمال سے متعلق مزید تین سے چار پائلٹ پروجیکٹ کرنا پڑیں گے۔

سیکریٹری الیکشن کمیشن نے بتایا تھا کہ ایک پولنگ اسٹیشن پر کتنی الیکٹرانک ووٹنگ مشینیں ہوں گی، اس کا اندازہ لگانا اور پتہ چلانا باقی ہے۔

عمر حمید خان نے کہا کہ قانون سازی کے تحت نئی مردم شماری کے بعد نئی حلقہ بندیاں کرنا ہوں گی۔ ای وی ایم کا بل تو پاس ہوگیا لیکن ہم اس کے مطابق انتخابات کرانے کے پابند نہیں ہیں، ان مشینوں کے استعمال میں ہمیں کافی وقت لگے گا۔