ترجمان دفتر خارجہ نے کہا ہے کہ پاکستان آسیان ممالک کے ساتھ اپنے تعلقات کو ترجیح دیتا ہے۔

تفصیلات کے مطابق ترجمان دفتر خارجہ ممتاز زہرا بلوچ نے اپنے ایک بیان میں کہا کہ وزیر خارجہ بلاول بھٹو زرداری 7 سے 9 دسمبر  تک انڈونیشیا اور سنگاپور کے سرکاری دورے کریں گے جبکہ انڈونیشیا میں وزیر خارجہ انڈونیشیا کی وزیر خارجہ ریتنو مرسودی کے ساتھ دو طرفہ ملاقات کریں گے۔

انہوں نے کہا کہ وزیر خارجہ دو کثیرالجہتی پروگراموں میں شرکت کریں گے، ان پروگراموں میں 15 واں بالی ڈیموکریسی فورم اور افغان خواتین کی تعلیم پر بین الاقوامی کانفرنس شامل ہیں۔

ممتاز زہرا بلوچ کا کہنا تھا کہ 15 ویں بالی ڈیموکریسی فورم میں وزیر خارجہ جمہوری اقدار کے تئیں پاکستان کے عزم اور جدید دور کے چیلنجز کا جواب دینے میں جمہوریت کی اہمیت کو اجاگر کریں گے۔

ان کا یہ بھی کہنا تھا کہ وزیر خارجہ افغان خواتین کی تعلیم پر بین الاقوامی کانفرنس میں افغانستان میں دیرپا امن اور ترقی کے لیے پاکستان کی کوششوں کو اجاگر کریں گے۔

ترجمان دفتر خارجہ نے کہا کہ سنگاپور میں وزیر خارجہ سنگاپور کے ہم منصب ڈاکٹر ویوین بالاکرشنن اور صدر حلیمہ یعقوب سے ملاقات کریں گے اور ان ملاقاتوں میں دوطرفہ تعلقات کے وسیع میدان پر تبادلہ خیال کیا جائے گا۔

ممتاز زہرا بلوچ نے یہ بھی کہا کہ پاکستان آسیان ممالک کے ساتھ اپنے تعلقات کو ترجیح دیتا ہے، وزیر خارجہ کے انڈونیشیا اور سنگاپور کے دورے اس اعلیٰ ترجیح کے عکاس ہیں۔

ترجمان دفتر خارجہ ممتاز زہرا بلوچ نے مزید کہا کہ پاکستان باہمی دلچسپی کے تمام شعبوں میں انڈونیشیا اور سنگاپور کے ساتھ تعلقات کو مزید مستحکم کرنے کے عزم کا اظہار ہے۔