اسلام آباد: پاکستان کے سینئر اینکر پرسن اور معروف صحافی ارشد شریف قتل کیس کی مشترکہ تحقیقاتی ٹیم (جے آئی ٹی) کی تشکیل کا نوٹیفکیشن جاری کردیا گیا ہے۔

جاری کیے گئے نوٹیفکیشن کے مطابق سی پی او ہیڈ کواٹر، ڈی پی او صدر، ایس ایچ او رمنا جے آئی ٹی کا حصہ ہیں۔

جے آئی ٹی اپنی رپورٹ جلد از جلد مکمل کرکے آئی جی اسلام آباد کو جمع کرائے گی۔

خیال رہے کہ ایس ایس پی انویسٹی گیشن کی درخواست پر جے آئی ٹی تشکیل دی گئی ہے۔

گزشتہ روز سینئر صحافی ارشد شریف کے قتل کی تحقیقات کے لئے وفاقی پولیس نے جے آئی ٹی بنانے کا فیصلہ کیا تھا۔

اس سے قبل سپریم کورٹ کے حکم پر صحافی ارشد شریف کے قتل کا مقدمہ اسلام آباد کے تھانہ رمنا میں درج کرلیا گیا تھا۔

ارشد شریف کے قتل کے مقدمے میں پولیس خود مدعی بن گئی اور اسلام آباد کے تھانے میں پرچہ کاٹ دیا، جب کہ تفتیش کا رخ موڑنے کے لیے اپنی مرضی کے تین ملزموں کو نامزد کیا گیا۔

ایف آئی آر کے مطابق ملزمان کراچی کے رہائشی ہیں جن میں سے وقار احمد اور خرم احمد سگے بھائی ہیں جو کینیا میں مقیم ہیں اور مقدمے میں تیسرا نام طارق احمد وصی کا ہے۔

واضح رہے کہ سپریم کورٹ آف پاکستان کے حکم پر اسلام آباد میں بول نیوز کے سینیئر اینکر پرسن شہید ارشد شریف کے قتل کی ایف آئی آر درج کی گئی۔

 اسلام آباد پولیس نے شہید صحافی ارشد شریف کے قتل کی ایف آئی آر ان کی والدہ کی مدعیت کے بغیر ہی درج کی جبکہ شہید کی والدہ کا کہنا تھا کہ حکومت میری مدعیت میں بیٹے کے قتل کی ایف آئی آردرج کرے۔