تنویر الیاس نےکہا ہے کہ حکومتِ عوام کے مسائل کو ترجیحی بنیادوں پر حل کرنے کیلئے کوشاں ہے۔

تفصیلات کے مطابق وزیرِ اعظم آزاد جموں و کشمیر سردار تنویر الیاس خان سے ان کی رہائش گاہ پر وائس چیئرمین پاکستان تحریک انصاف سابق وزیر خارجہ مخدوم شاہ محمود قریشی کی ملاقات ہوئی ہے۔

اس موقع پر وائس چیئرمین پاکستان تحریک انصاف شاہ محمود قریشی نے وزیراعظم آزاد کشمیر سردار تنویر الیاس خان کو آزاد کشمیر میں 31 سال بعد بلدیاتی الیکشن کے کامیاب انعقاد اور تحریک انصاف کی جیت پر مبارکباد دی۔

وزیرِ اعظم آزاد کشمیر سردار تنویر الیاس خان نے وائس چیئرمین شاہ محمود قریشی کا شکریہ ادا کرتے ہوئے انہیں آزاد جموں و کشمیر کی تعمیر و ترقی کیلئے آئندہ کے لائحہ عمل سے آگاہ کیا۔

تنویر الیاس خان نے کہا کہ حکومتِ آزاد جموں و کشمیر عوام کے مسائل کو ترجیحی بنیادوں پر حل کرنے کے ساتھ ساتھ، بھارتی قابض افواج کے مظالم کا سامنا کرنے والے مقبوضہ کشمیر کے باسیوں کو درپیش مشکلات کو عالمی سطح پر اجاگر کرنے کیلئے کوشاں ہے۔ اس سلسلے میں امریکی سفیر اور یورپی پارلیمنٹ ممبران کا دورہ آزاد کشمیر انتہائی اہم رہا ہے۔

وزیرِ اعظم آزاد کشمیر سردار تنویر الیاس خان نے مزید کہا کہ اسلامی تعاون تنظیم کے سیکریٹری جنرل کے حالیہ دورے سے مسئلہ کشمیر کو تقویت ملی ہے۔

اس موقع پر وائس چیئرمین پاکستان تحریک انصاف شاہ محمود قریشی کا کہنا تھا کہ پاکستان تحریک انصاف کشمیریوں کے حقِ خود ارادیت کے حصول کی جدوجہد میں ان کے ساتھ شانہ بشانہ کھڑے ہیں ، ہم کشمیریوں کی اس جدوجہد میں ان کی سیاسی، سفارتی و اخلاقی معاونت جاری رکھنے کیلئے پر عزم ہیں۔