قومی احتساب بیورو(نیب ) کے چئیرمین جسٹس جاوید اقبال سے پا کستان میں جرمنی کے سفیر برن ہارڈ شلاگ ہیک نے نیب ہیڈکوارٹرز میں ملاقات کی ہے۔

ملاقات کے دوران چئیرمین (نیب) جسٹس جاوید اقبال نے جرمن سفیر کو پاکستان سے کرپشن کے خاتمہ کیلئے نیب کی قومی انسداد بدعنوانی حکمت عملی اور بدعنوان عناصر کو قانون کے کٹہرے میں لانے کیلئے نمایاں کوششوں سے آگاہ کیا۔

اس موقع پر جرمنی کے سفیر برن ہارڈ شلاگ ہیک نے چئیرمین (نیب) جسٹس جاوید اقبال کی دانشمندانہ قیادت میں ملک سے بدعنوانی کے خاتمہ اور کرپشن فری پاکستان کیلئے کوششوں کو سراہا۔

واضح رہے اس سے قبل قومی احتساب بیورو (نیب) کے چیئرمین جسٹس جاوید اقبال نے نیب ہیڈ کوارٹرز کے تمام شعبوں کی کارکردگی کے جائزہ سے متعلق اجلاس کی صدارت کرتے ہوئے کہا تھا  کہ نیب زیرو کرپشن اور 100 فیصد ترقی پر یقین رکھتا ہے، نیب نے وائٹ کالر کرائم کی انوسٹی گیشن کے لئے کثیر الجہتی انسداد بدعنوانی کی حکمت عملی تشکیل دی ہے اور جدید فرانزک سائنس لیبارٹری قائم کی ہے۔

نیب زیرو کرپشن اور 100 فیصد ترقی پر یقین رکھتا ہے، جاوید اقبال

چیئرمین جسٹس جاوید اقبال نے کہا  تھا کہ نیب نے انسداد بدعنوانی کی جامع حکمت عملی وضع کی ہے۔ نیب کی موجودہ انتظامیہ کی جانب سے کئے گئے اقدامات سے متعلق زندگی کے تمام طبقوں نے مثبت ردعمل کا اظہار کیا ہے۔

نیب کے مقدمات میں سزا کی شرح 70 فیصد ہے جو کہ وائٹ کالر کرائم کی انوسٹی گیشن میں کسی بھی ادارے کی شاندار کارکردگی ہے۔ چیئرمین جسٹس جاوید اقبال نے کہا کہ نیب نے وائٹ کالر کرائمز کے مقدمات کی تفتیش کے لئے جدید ٹیکنالوجی سے استفادہ کے لئے جدید فرانزک سائنس لیبارٹری قائم کی ہے۔

چیئرمین نیب نے مزید کہا تھا کہ تفصیلی تجزیئے کے بعد آپریشن، پراسیکیوشن، ٹریننگ اینڈ ریسرچ، ہیومن ریسورس ڈویلپمنٹ، آگاہی و تدارک ڈویژن سمیت دیگر شعبوں کو اصلاحات کے ذریعے فعال بنایا گیا ہے۔