قطر میں جاری فیفا ورلڈ کپ میں تیسری پوزیشن کے میچ میں کروشیا نے مراکش کو 1-2 سے شکست دے دی ہے۔

فیفا ورلڈ کپ میں تیسری پوزیشن کا میچ کروشیا اور مراکش کی ٹیموں کے درمیان خلیفہ انٹرنیشنل اسٹیڈیم میں کھیلا گیا جس میں کروشیا نے مراکش کو 1 گول کے مقابلے میں 2 گول سے شکست دے کر تیسری پوزیشن حاصل کرلی ہے۔

کروشیا کی جانب سے پہلا گول جوسکو گویرڈیول نے 7 ویں منٹ میں کیا جس کے بعد مراکش کے اشرف داری نے 9 ویں ہی منٹ میں گول کرکے برابر کر دیا۔

بعد ازاں دونوں ٹیموں نے گول کرنے کی بھرپور کوشش کی اور کروشیا کے کھلاڑی مِسلاف اورسِچ 42 ویں منٹ میں گول کرنے میں کامیاب رہے۔

میچ کے اختتام تک مراکش کے کھلاڑیوں نے گول برابر کرنے کی بھرپور کوشش کی لیکن ناکام رہے اور یوں یہ میچ کروشیا کے نام رہا۔

واضح رہے کہ قطر میں فٹ بال ورلڈ کپ اپنے اختتام کے قریب پہنچ چکا ہے جس میں اب صرف فائنل ہونا باقی جو کل فرانس اور ارجنٹائن کی ٹیموں کے درمیان کھیلا جائے گا۔

خیال رہے کہ فیفا ورلڈ کپ میں مراکش اور کروشیا کی ٹیمیں گروپ ایف میں شامل تھیں جب کہ گروپ ایف کے مقابلے میں دونوں ٹیموں کا مقابلہ بغیر کسی گول کے برابر رہا تھا۔

سیمی فائنل میں شکست کے باعث دونوں ٹیمیں تیسری پوزیشن کے حصول کیلئے مدمقابل تھیں جب کہ کروشیا نے کوارٹر فائنل میں برازیل کو اپ سیٹ کر کے سیمی فائنل میں جگہ بنائی تھی۔

وہیں مراکش نے کوارٹر فائنل میں پرتگال کو اپ سیٹ کرکے سیمی فائنل میں جگہ بنائی تھی۔