خواتین کی بڑی تعداد روزانہ میک اپ کا استعمال کرتی ہیں اور اب یہ کسی حد تک ضرورت بن گیا ہے۔ یہ بات درست ہے کہ میک اپ میں مختلف قسم کے کیمیلز استعمال کیے جاتے ہیں جو جلد پرزیادہ وقت کے لیے لگے رہے تو جلد متاثر ہونے لگتی ہے۔

دیکھا گیا ہے کہ اکثر خواتین چہرے سے میک اپ صاف کرنے کے لیے بھی مختلف کمیکلز کا استعمال کرتی ہیں جو جلد پر مزید نقصان کا باعث بنتا ہے۔ اسی لیے یہاں پر ان قدرتی اجزاء کے بارے میں بتایا جارہا ہے جو چہرے سے میک اپ صاف کر کے جلد کو جواں بنانے میں بھی مدد فراہم کریں گے۔

مگر ناشپاتی (ایواکاڈو)

ایواکوڈوکا صرف چھوٹا سا ٹکڑا چہرے سے میک اپ کو صاف کر کے جلد کو مزید خوبصورت بنا دے گا اس کے تیل میں پائے جانے والے وٹامنز A، D، E اور اومیگا تھری فیٹی ایسڈز جلد اور آنکھوں کے لیے نمی بخشنے والی کریم کا کام کر سکتے ہیں۔ اسے ہلکے ہاتھ سے چہرے پر ملیں۔

ناریل کا تیل

ناریل کا تیل ایک بہترین قدرتی کلینزرہے ساتھ ہی یہ جلد پر آسانی سے جذب ہوجاتا ہے۔ اس میں کم مالیکیولر وزن اور فائدہ مند فیٹی ایسڈز ہوتے ہیں، جو آپ کی جلد کو صحت مند رکھنے میں معاون ثابت ہوتے ہیں۔

ناریل کا تیل ہر طرح کے میک اپ کو صاف کرنے کی صلاحیت رکھتا ہے۔

کھیرے کے ٹکڑے

کھیرے کے ٹکڑے قدرتی طریقے سے میک اپ اتارنے کے لیے بہترین ہیں۔ اس کی وجہ یہ ہے کہ کھیرے میں سوزش کو کم کرنے کی خصوصیات پائی جاتی ہیں، جو مہاسوں یا جلن والی جلد کو سکون بخشتی ہیں۔

میک اپ اتارنے کے لیے ایک کھیرا لے کر اس کا پیسٹ بنالیں، پھر اسے اپنے چہرے پر کلینزر کے طور پر استعمال کریں۔ اگر آپ کو اس کے ساتھ میک اپ صاف کرنے میں دشواری کا سامنا ہوتو اس میں تھوڑا سا زیتون کا تیل یا دودھ شامل کر سکتے ہیں۔

شہد

شہد کو بیکنگ سوڈا کے ساتھ ملایا جائے تو یہ ایک بہترین میک اپ ریموورثابت ہوتا ہے۔ جو نرمی سے چہرہ صاف کردیتا ہے۔

اس مقصد کے لیے شہد میں بیکنگ سوڈا اور اپنے پسندیدہ تیل کے چند قطرے شامل کرکے اچھی طرح ملائیں۔ گرم واش کلاتھ کا استعمال کرتے ہوئے چہرہ صاف کریں۔ یہ ایک قدرتی میک اپ ریموور اور کلینزر ثابت ہوگا۔