ہم میں سے اکثر لوگ باتھ روم میں یا پھر الماری میں کافور کی گولیاں رکھتے ہیں تاکہ کپڑوں میں کیڑا نہ لگے اور باتھ روم میں بھی کیڑے مکوڑے گھر نہ کریں ساتھ ہی خوشبو بھی آتی رہے۔

مگر کیا آپ نے کبھی سوچا ہے اس کے مزید اور کونسے استعمال ہو سکتے ہیں؟

اگر نہیں! تو چلیں آج ہم آپ کو بتاتے ہیں کہ کافور کی گولیاں باتھ روم اور الماریوں میں رکھنے کے علاوہ اس سے اور کونسے فوائد حاصل کئے جا سکتے ہیں۔

کافور کے مختلف استعمال اور فوائد

کافور اپنی اینٹی بیکٹیریل، اینٹی فنگل اور اینٹی سوزش خصوصیات کی وجہ سے مختلف قسم کے حالات میں استعمال کیا جا سکتا ہے۔

ماہرین کے مطابق اس کا استعمال جلد کے علاج، سانس کے افعال کو بہتر بنانے اور درد کو دور کرنے کے لیے کیا جا سکتا ہے۔

ٹھنڈ اور کھانسی میں آرام دہ

سردی کا موسم ہے ایسے میں اگر آپ کو ٹھنڈ لگ گئی ہے اور کھانسی ہو رہی ہے تو کافور کا استعمال اس مسئلے میں بھی آپ کو حیرت انگیز فوائد پہنچا سکتا ہے۔

کافور اپنی خوشبو کی سے بھی جانا جاتا ہے یہ آروما تھراپی کے لئے بھی استعمال کیا جاتا ہے جس سے ناک کی اندرونی سوزش دور ہو جاتی ہے اور کھانسی میں بھی آرام آتا ہے۔

اس کے لئے آپ کو پانی میں کافور ڈال کر اُبالنا ہوگا اور پھر اس پانی کی بھاپ لینی ہو گی، ٹھنڈ ختم ہو جائے گی اور کھانسی میں بھی آرام آئے گا ایک مرتبہ اسے ضرور آزما کر دیکھیں۔

دانوں کا علاج

کافور سے دانوں کا علاج ممکن ہے، آپ اسے چہرے پر استعمال کر کے چہرے کے دانوں سے نجات پا سکتے ہیں، کھلے مسام بند کرنے اور دانوں سے نجات کے لئے آپ ٹی ٹری آئل میں کافور اسنشئیل آئل ملا کر چہرے پر لگائیں، یا پھر کسی اچھے لوشن میں کافور اسنشئیل آئل ملا کر چہرے پر لگانے سے بھی دانوں سے نجات حاصل کی جا سکتی ہے۔

بالوں میں کافور کا حیرت انگیز استعمال

کافور کو کھوپرے کے تیل میں ملا کر اگر بالوں پر لگایا اور مساج کیا جائے تو اس سے بالوں کی خشکی دور ہوگی، بال مضبوط ہوں گے بالوں کا گِرنا بھی حیرت انگیز طور پر بے حد کم ہو جائے گا۔

جوؤں کا خاتمہ

اگر آپ کے سر میں جوئیں ہیں اور آپ ان سے پریشان ہیں تو پانی میں کافور آئل ڈال کر یا پھر کھوپرے کے تیل میں کفور ڈال کر اس سے سر کا مساج کریں آپ کو جوؤں سے مکمل نجات مل جائے گی۔

زخم اور جلے ہوئے پر کافور کا استعمال

کافور کو اگر جلی ہوئی جلد پر لگایا جائے تو یہ ٹھنڈک کا احساس پہنچائے گا، اور زخم پر لگانے سے بھی زخم جلدی سوکھے گا۔

   ایگزیمہ سے نجات

اگر آپ کو ایگزیمہ ہے تو ایک چٹکی کافور کو کھوپرے کے تیل میں ملا کر جلد پر لگائیں، بہت جلدی فائدہ ہوگا ایگزیمہ ختم ہو جائے گا۔

 درد اور سوزش

اگر آپ کو کسی کیڑے نے کاٹ لیا ہے اور متاثرہ جگہ پر درد اور سوزش ہو گئی ہے تو کافور کو براہِ راست متاثرہ جگہ پر لگانے سے درد اور سوزش سے نجات ملے گی۔