وزیرخزانہ نے کہا ہے کہ حکومت کا کام فنڈز جاری کرنا ہے انتخابات کرانا نہیں۔

تفصیلات کے مطابق وفاقی وزیرخزانہ اسحاق ڈار نے میڈیا سے گفتگو کرتے ہوئے کہا کہ اسلام آباد میں بیٹھ کر موجودہ سیاسی صورتحال دیکھ رہا ہوں، گزشتہ روز وزیر اعظم شہباز شریف نے آصف علی زرداری سے ملاقات کی۔

انہوں نے کہا کہ آصف زرداری چودھری شجاعت حسین سے ملنے گئے تھے، اسمبلیاں تحلیل ہوتی ہیں تو 90 روز کے اندر انتخابات ہو سکتے ہیں۔

‘آئندہ انتخابات مردم شماری کے بعد ہی ہوں گے’

اسحاق ڈار نے یہ بھی کہا کہ حکومت کا کام فنڈز جاری کرنا ہے انتخابات کرانا نہیں، آئندہ انتخابات مردم شماری کے بعد ہی ہوں گے جس کے لیے حکومت فنڈز جاری کر چکی ہے۔

مزید پڑھیں؛ پاکستان کے ڈیفالٹ ہونے کا کوئی امکان نہیں، وزیرخزانہ اسحاق ڈار

وفاقی وزیرخزانہ کا کہنا تھا کہ جب بھی الیکشن ہوں گے ہم تیار ہیں، امید ہے کہ ہمیں الیکشن میں کامیابی ملے گی۔

اسحاق ڈار کا یہ بھی کہنا تھا کہ انتخابات کی تاریخ کا فیصلہ الیکشن کمیشن نے ہی کرنا ہے، الیکشن کمیشن انتخابات کا اعلان کرے گا تو ہم بھی تیار ہیں، چیف الیکشن کمشنر اپنا آئینی کردار ادا کریں گے۔

انہوں نے کہا کہ قائد اعظم محمد علی جناح کے یوم پیدائش کے موقع پر ایوان صدر کا دورہ کیا، جب صدرعارف علوی سے ملاقات ہو تو باتیں ہوتی رہتی ہیں۔

اسحاق ڈار نے یہ بھی کہا کہ پیٹرولیم مصنوعات اور ڈالر کی قیمت میں واضح کمی آچکی ہے،40 ماہ کی اقتصادی تباہی کو 5 سے 6 ماہ میں ٹھیک نہیں کرسکتے۔

ان کا کہنا تھا کہ میں کسی کی بات کا جواب نہیں دیتا، مفتاح اسماعیل تجزیہ کار بن کر کافی باتیں کہتے ہیں جو نہیں ہونی چاہئیں۔

وزیرخزانہ اسحاق ڈار کا مزید کہنا تھا کہ نوازشریف کی وطن واپسی میڈیکل کلیئرنس سے مشروط ہے، پاکستان ڈیفالٹ نہیں کرے گا۔