امریکی اداکار امبر ہرڈ نے سابق شوہر جونی ڈیپ کے ساتھ ہتک عزت کیس میں صلح کرنے کا اعلان کردیا ہے۔

غیر ملکی خبر رساں ادارے کے مطابق امریکی اداکار امبر ہرڈ نے سوشل میڈیا پوسٹ میں اعلان کیا ہے کہ ’انہوں نے جونی ڈیپ کے ساتھ لاکھوں ڈالر ہرجانے کے کیس میں تصفیے کا فیصلہ کرلیا ہے‘۔

امبر ہرڈ کا کہنا تھا کہ ’میں اپنی اپیل واپس لے رہی ہوں اور کیس کا تصفیہ چاہتی ہوں کیونکہ میں ایک اور ٹرائل کا سامنا نہیں کرنا چاہتی‘۔

انہوں نے کہا کہ کافی مشاورت کے بعد میں نے تصفیہ کرنے کا مشکل فیصلہ کیا، میں نے یہ فیصلہ امریکی عدالتی نظام پر بداعتمادی کے بعد کیا ہے۔

امبر ہرڈ نے مزید لکھا کہ میں یہ بتانا ضروری سمجھتی ہوں کہ میں ایسا کبھی نہیں کرنا چاہتی تھی میں نے اپنا دفاع کیا لیکن ایسا کرنے میں جہاں تک مجھے معلوم ہے میری زندگی متاثر ہوئی ہے۔

واضح رہے کہ 2018 میں جونی ڈیپ نے واشنگٹن پوسٹ میں امبر ہرڈ کے آرٹیکل لکھنے کے بعد ان پر پانچ لاکھ ڈالر ہرجانے کا دعویٰ کیا تھا۔

جب کہ اس کے جواب میں امبر ہرڈ نے خود کو گھریلو تشدد کا شکار قرار دیتے ہوئے جونی ڈیپ پر 10 کروڑ ڈالر کے ہرجانے کا دعویٰ کیا تھا۔

بعد ازاں امبر ہرڈ کی جانب سے لگائے گئے الزامات ثابت نہ ہونے پر عدالت نے امبر ہرڈ پر 1 کروڑ ڈالر ادا کرنے کا حکم دیا تھا جب کہ جونی ڈیپ کو 20 لاکھ ڈالر ادا کرنے کا کہا گیا تھا۔