وزیراعظم شہباز شریف اور مسلم لیگ ن کے قائد نواز شریف کے درمیان ٹیلی فونک رابطہ ہوا۔

ذرائع نے بتایا کہ نواز شریف اور شہبازشریف کے درمیان ٹیلی فونک رابطے کے دوران دونوں رہنماؤں نے ملکی سیاسی صورتحال بالخصوص  پنجاب کی سیاسی صورتحال کے حوالے سے تبادلہ خیال کیا۔

ذرائع کا کہنا ہے کہ شہبازشریف نے آصف زرداری، چوہدری شجاعت سے ہونے والی ملاقاتوں اور سیاسی رابطوں کے حوالے سے نواز شریف کو رپورٹ پیش کی۔

ذرائع نے مزید بتایا کہ اس دوران نواز شریف نے وزیراعظم شہباز شریف کو اہم ہدایات بھی جاری کی ہیں۔

آصف زرداری اور وزیر اعظم کا رابطہ

اس سے قبل سابق صدر آصف علی زرداری اور وزیر اعظم شہباز شریف کا رابطہ ہوا جس میں پنجاب میں اعتماد کے ووٹ کے حوالے سے مشاورت کی گئی۔

رابطے کے دوران دونوں رہنماؤں نے پرویز الہیٰ کے اعتماد کے ووٹ نہ لینے پر مشاورت کی۔

یہ بھی پڑھیں: پیپلزپارٹی اور ن لیگ کے ارکان عدم اعتماد پر ہمارا ساتھ دیں گے، سبطین خان

پی پی اور ن لیگ کی قیادت کی ہدایت پر دونوں جماعتوں کے رہنماؤں کو گورنر پنجاب سے مشاورت کرنے کی ہدایت دی۔

اس کے علاوہ دونوں رہنماؤں نے اعتماد کا ووٹ کے علاوہ تحریک عدم اعتماد کی ووٹنگ ہونے پر بھی مشاورت کی۔

گورنر پنجاب کا وزیر اعظم کو ٹیلی فون

علاوہ ازیں گورنر پنجاب بلیغ الرحمان نے بھی وزیر اعظم شہباز شریف سے رابطہ کیا اور اسپیکر سبطین خان کی رولنگ کے پر مشاورت کی۔

ذرائع نے بتایا کہ وزیر اعظم شہباز شریف نے گورنر بلیغ الرحمان کو قانونی مشاورت کا حکم دے دیا۔

اس دوران وزیر اعلیٰ کو ڈینٹفائی کرنے کے حوالے سے بھی مشاورت کی گئی جبکہ گورنر پنجاب آج وزیر اعلیٰ کو ڈینٹفائی اور گورنر راج لگانے کے حوالے سے مشاورت کریں گے۔

ذرائع کے مطابق گورنر پنجاب کا کہنا تھا کہ آپ کی ہدایت پر آج اجلاس بلاکر فیصلہ کر لیا کہ اسپیکر کے فیصلے سے اختلاف کر رہے ہیں، خط تیار کر لیا، بس مشاورت کے بعد جاری کریں گے۔

ذرائع نے بتایا کہ وزیراعظم نے گورنر کو حکم دیا کہ ابھی معاملے پر دوبارہ نظر ثانی کریں گے۔ اسپیکر کو ابھی جوابی خط بھیجوانے سے روک دیا ہے۔

خیال رہے کہ سابق وفاقی وزیر قانون فروغ نسیم بھی وزیر اعظم کی ہدایت پر گورنر ہاؤس پہنچ گئے ہیں۔