وزیراعظم شہباز شریف سے جمیعت علمائے اسلام (ف) صدر مولانا فضل الرحمان کی ملاقات ہوئی ہے۔

ذرائع نے بتایا کہ وزیراعظم اور مولانا فضل الرحمان کے دومیان ہونے والی ملاقات میں ملک کی مجموعی سیاسی صورتحال پر بات چیت کی گئی۔

ذرائع کے مطابق دونوں رہنماؤں کے دومیان وزیر اعلیٰ پنجاب کے معاملے پر ڈٹے رہنے پر بھی اتفاق کیا گیا۔

ذرائع کا کہنا تھا کہ مولانا فضل الرحمان نے وزیر اعظم کو بلوچستان اور خیبر پختونخوا میں اپنی حکمت عملی سے آگاہ کیا۔

ذرائع نے بتایا کہ مولانا فضل الرحمان نے کہا کہ عوام کو جلد اور فوری ریلیف کے لیے اقدامات کو تیز کیا جائے اور اتحادی جماعتوں کا اجلاس جلد بلا کر صورتحال کا جائزہ لے کر متفقہ حکمت عملی بنائی جائے۔

ذرائع کا مزید کہنا تھا کہ دوسری جانب وزیراعظم شہباز شریف نے کہا کہ عوام کو ریلیف دینا حکومت کی ترجیح ہے اور سابقہ حکومت کے پیدا کردہ مسائل سے نمٹنا تاخیر کی وجہ ہے۔

خیال رہے کہ ملاقات میں وفاقی وزیر مواصلات مولانا اسعد محمود بھی موجود تھے۔

شہباز شریف اور نواز شریف کے درمیان ٹیلی فونک رابطہ، اہم ہدایات جاری

دو روز قبل وزیراعظم شہباز شریف اور مسلم لیگ ن کے قائد نواز شریف کے درمیان ٹیلی فونک رابطہ ہوا۔

ذرائع نے بتایا کہ نواز شریف اور شہبازشریف کے درمیان ٹیلی فونک رابطے کے دوران دونوں رہنماؤں نے ملکی سیاسی صورتحال بالخصوص  پنجاب کی سیاسی صورتحال کے حوالے سے تبادلہ خیال کیا۔

یہ بھی پڑھیں: وزیراعلیٰ پنجاب کو ڈی نوٹیفائی کرنے کے خلاف پٹیشن دائر

ذرائع کا کہنا ہے کہ شہبازشریف نے آصف زرداری، چوہدری شجاعت سے ہونے والی ملاقاتوں اور سیاسی رابطوں کے حوالے سے نواز شریف کو رپورٹ پیش کی۔

ذرائع نے مزید بتایا کہ اس دوران نواز شریف نے وزیراعظم شہباز شریف کو اہم ہدایات بھی جاری کی ہیں۔

آصف زرداری اور وزیر اعظم کا رابطہ

اس سے قبل سابق صدر آصف علی زرداری اور وزیر اعظم شہباز شریف کا رابطہ ہوا جس میں پنجاب میں اعتماد کے ووٹ کے حوالے سے مشاورت کی گئی۔

مزید پڑھیں: گورنر پنجاب کو عہدے سے ہٹانے کیلئے صدر پاکستان اور وزیراعظم کو مراسلہ ارسال

رابطے کے دوران دونوں رہنماؤں نے پرویز الہیٰ کے اعتماد کے ووٹ نہ لینے پر مشاورت کی۔

پی پی اور ن لیگ کی قیادت کی ہدایت پر دونوں جماعتوں کے رہنماؤں کو گورنر پنجاب سے مشاورت کرنے کی ہدایت دی۔

اس کے علاوہ دونوں رہنماؤں نے اعتماد کا ووٹ کے علاوہ تحریک عدم اعتماد کی ووٹنگ ہونے پر بھی مشاورت کی۔