بانی پاکستان  قائدِ اعظم محمدعلی جناحؒ  کے یوم پیدائش پر پاک فضائیہ نے زبردست خراج عقیدت پیش کیا ہے۔

پاک فضائیہ کے شعبہ تعلقات عامہ نے قائداعظم محمد علی جناحؒ کے یوم پیدائش کی مناسبت سے ایک ملی نغمہ جاری کیا ہے جس میں پاک فضائیہ کی جانب سے بانی پاکستان کو خراج عقیدت پیش کیا گیا ہے۔

ترجمان پاک فضائیہ نے بتایا کہ نغمے میں اس امر کو اجاگر کیا گیا ہے کہ قائداعظم محمد علی جناحؒ نے برصغیر کے مظلوم مسلمانوں میں امید کی کرن روشن کی اور انہیں ایک قوم کی صورت میں متحد کر کے ان کے لئے ایک علیحدہ و آزاد وطن حاصل کیا۔

ترجمان پاک فضائیہ کے مطابق یہ قائداعظم کی انتھک کاوشوں کا ہی ثمر ہے کہ ہم آج ایک آزاد مملکت میں سانس لے رہے ہیں۔

پاک فضائیہ کے ترجمان کا مزید کہنا تھا کہ نغمے میں اس عہد کی تجدید کی گئی ہے کہ پاک فضائیہ کا ہر شاہین مادر وطن کی حفاظت کے لیے ہمہ وقت تیار ہے اور ضرورت پڑنے پر کسی بھی قربانی سے گریز نہیں کرے گا۔

قائد اعظم کا 147 واں یوم پیدائش

خیال رہے کہ بانی پاکستان قائدِ اعظم محمدعلی جناح کا 147 واں یوم پیدائش آج انتہائی عقیدت ، احترام اور ملی جوش و جذبے کے ساتھ منایا جا رہا ہے، اس موقع پر کراچی میں مزارِ قائد پر گارڈز کی تبدیلی کی پر وقار تقریب منعقد ہوئی۔

تقریب میں پاک فضائیہ کے کیڈٹس سے گارڈز کے فرائض پاکستان ملٹری اکیڈمی کاکول کے دستے نے سنبھال لیے۔

تقریب کے مہمان خصوصی میجر جنرل عمر عزیز تھے جنہوں نے گارڈز کا معائنہ کیا، مزار قائد پر فاتحہ پڑھی اور پھولوں کی چادر بھی چڑھائی۔

اس کے علاوہ اعزازی گارڈز نے مہمان خصوصی میجر جنرل عمر نسیم کو جنرل سلام پیش کیا اور انہوں نے مہمانوں کی کتاب پر تاثرات بھی درج کیے۔

اس موقع پر گورنرسندھ، وزیراعلیٰ، کمشنر کراچی اور دیگر اہم شخصیات مزار قائد پر حاضری دیں گے جبکہ تینوں افواج کے نمائندے ، ڈی جی رینجرز بھی مزار قائد پر حاضری دیں گے۔

واضح رہے کہ قائدِ اعظم محمد علی جناحؒ 25 دسمبر 1876ء کو آج ہی کے روز کراچی میں پیدا ہوئے تھے۔ اس دن کی مناسبت سے پاکستان سمیت ملک بھر میں سرکاری عمارتوں پر قومی پرچم لہرایا جا رہا ہے۔