وزیر اعظم شہباز شریف نے ہدایت دی ہے کہ توانائی کی ضروریات اور وسائل کا استعمال بہتر کرنا ہوگا۔

تفصیلات کے مطابق وزیر اعظم پاکستان شہباز شریف کی زیر صدارت وفاقی کابینہ کا اجلاس منعقد ہوا جس میں وزارت توانائی کی جانب سے توانائی بچت پلان پر بریفنگ دی گئی۔

اجلاس میں بریفنگ

ذرائع نے بتایا کہ اجلاس میں وزیر اعظم کی تشکیل کردہ مشاورتی کمیٹی کی توانائی پلان پر قائم کمیٹی نے رپورٹ پیش کی اور توانائی بچت پلان پر صوبوں سے ہونے والی مشاورت پر خواجہ آصف نے بریفنگ دی۔

اس کے علاہ پاور ڈویژن کے حکام نے بھی کابینہ کو توانائی پلان پر عملدرآمد سے متعلق بریفنگ دی۔

اجلاس میں متعدد منظوریاں

کابینہ نے ون اسٹاپ سروس ایکٹ کی منظوری دے دی اور ہارڈ شپ کیٹگری کی ایک دوا کی قیمت میں اضافہ 54 میں کمی کی سمری بھی منظور کرلی۔

یہ بھی پڑھیں: ڈیرہ اسماعیل خان میں تیل و گیس کے ذخائر دریافت

وفاقی کابینہ نے کابینہ کمیٹی برائے سویابین کی رپورٹ کی حتمی منظوری دے دی اور گورنمنٹ ٹو گورنمنٹ کمرشل ٹرانزیکشن ایکٹ 2022 کی بھی منظوری دے دی گئی۔

اس کے علاوہ کابینہ نے اقتصادی رابطہ کمیٹی اور نجکاری کمیٹی کے فیصلوں، ای سی سی کے 21 دسمبر کے فیصلوں اور خیبرپختونخوا میں وزیر اعظم سستا آٹا پیکج سے متعلق ای سی سی کے فیصلے کی توثیق کردی۔

 توشہ خانہ قوانین میں ترامیم منظور

ذرائع نے بتایا کہ وفاقی کابینہ نے توشہ خانہ قوانین میں ترامیم منظور کر لی ہیں، ترمیمی قانون کے تحت پبلک آفس ہولڈر کوئی بھی تحفہ ایک ماہ میں توشہ خانہ میں جمع کرانے کا پابند ہو گا۔

ذرائع کے مطابق نئے قانون کا اطلاق وزیر اعظم، گورنر، معاون خصوصی، اسپیکر، وزراء، وزرائے اعلیٰ پر ہو گا جبکہ سرکاری وفد کا حصہ نجی افراد بھی تحائف توشہ خانہ میں جمع کرانے کے پابند ہوں گے۔

ذرائع کا مزید کہنا تھا کہ توشہ خانہ کی تفصیلات ویب سائٹ پر پبلک کی جائیں گی اور توشہ خانہ قوانین کی خلاف ورزی پر تحفہ کی 5 گناہ مالیت کے برابر جرمانہ عائد ہو گا

بجلی اور گیس پر انحصار کو کم کرنے کے طریقے ڈھونڈنا ہونگے

اجلاس کے دوران وزیر اعظم نے ہدایت دی کہ توانائی کی ضروریات اور وسائل کا استعمال بہتر کرنا ہوگا، بجلی اور گیس پر انحصار کو کم کرنے کے طریقے ڈھونڈنا ہوں گے۔

انہوں نے کہا کہ قابل تجدید اور سستے توانائی ذرائع پر انحصار وقت کی اہم ضرورت ہے، تیل اور گیس کا سالانہ درآمدی بل 27 ارب ڈالر ہے۔

اتحادی حکومت ملک کے معاشی مسائل کے حل کیلئے کوشاں ہے

وزیر اعظم شہباز شریف نے مزید کہا کہ 30 سال کے دوران توانائی کے شعبے میں کوئی اصلاحات نہیں کی گئیں، پی ٹی آئی حکومت نے سستا تیل اور گیس نہ خرید کر مجرمانہ غفلت کا مظاہرہ کیا، اتحادی حکومت ملک کے معاشی مسائل کے حل کیلئے کوشاں ہے۔

یہ بھی پڑھیں: سندھ میں تیل و گیس کے نئے ذخائر دریافت