بھارت میں تیار ہونے والا کھانسی کا شربت پینے سے ازبکستان میں کم از کم 18 بچے موت کے منہ میں چلے گئے ہیں۔

غیر ملکی میڈیا کی رپورٹس کے مطابق یہ واقعہ گیمبیا میں کم از کم 70 بچوں کی اسی طرح کی موت کے بعد ہوا جب انہوں نے ایک بھارتی فرم کا کھانسی اور نزلہ زکام کا شربت استعمال کیا تھا۔

ازبکستان کی وزارت صحت نے بھی تصدیق کرتے ہوئے کہا کہ بھارتی دوا ساز کمپنی میریون بائیوٹیک پرائیویٹ لمیٹڈ کے تیار کردہ شربت پینے سے کم از کم 18 بچے ہلاک ہو گئے ہیں۔

ازبکستان کی وزارت صحت نے مزید کہا کہ 21 میں سے 18 بچے جنہوں نے  سانس کی شدید بیماری میں مبتلا ہو کر یہ شربت پیا تھا، اس کے استعمال کے بعد موت ہو گئی۔

میڈیا رپورٹس کے مطابق کھانسی کے اس شربت کی مارکیٹنگ کمپنی کی ویب سائٹ پر سردی اور فلو کی علامات کے علاج کے طور پر کی جاتی ہے۔

بتایا جا رہا ہے کہ بھارتی شربت کی ایک کھیپ میں ایتھیلین گلائکول تھا، جس کے بارے میں وزارت نے کہا کہ یہ زہریلا مادہ ہے، وزارت نے منگل کو جاری کردہ اپنے بیان میں کہا کہ یہ شربت کورامیکس میڈیکل ایل ایل سی نے ازبکستان میں درآمد کیا تھا۔

دوسری جانب بھارت کے ہندو اخبار کی ایک رپورٹ کے مطابق بھارتی وزارت صحت کے حکام نے کہا کہ وہ ازبکستان کی رپورٹ سے واقف ہیں لیکن انہوں نے تبصرہ کرنے سے انکار کردیا۔

غیر ملکی خبر رساں ادارے کی رپورٹ کے مطابق بھارت نے گزشتہ روز ملک بھر میں ادویات کی کچھ فیکٹریوں کا معائنہ شروع کیا تاکہ اعلیٰ معیار کو یقینی بنایا جا سکے۔

بھارتی کمپنی کے تیار کردہ کھانسی کا شربت پینے سے ازبکستان میں ہونے والی ہلاکتیں گیمبیا میں ہونے والی ہلاکتوں کی طرح ہی ہیں جہاں کم از کم 70 بچوں کی موت کا الزام نئی دہلی میں قائم میڈن فارماسیوٹیکلز لمیٹڈ کے بنائے گئے کھانسی اور نزلہ زکام کے شربت پر لگایا گیا ہے۔

گیمبیا میں 70 بچوں کی ہلاکتوں کے بعد گیمبیا کی حکومت نے بھارت کے خلاف الزام عائد کیا تھا مگر بھارتی حکومت اور کمپنی دونوں نے ان دوائیوں کی غلطی سے انکار کیا ہے۔

واضح رہے کہ ہندوستان کو دنیا کی فارمیسی کے طور پر جانا جاتا ہے، اور اس کی دواسازی کی برآمدات گزشتہ دہائی کے دوران دگنی سے زیادہ ہو کر گزشتہ مالی سال میں 24.5 بلین ڈالر تک پہنچ گئی ہیں۔

ازبک وزارت صحت نے کہا کہ اس نے سات ملازمین کو بروقت اموات کا تجزیہ نہ کرنے اور ضروری اقدامات نہ کرنے پر غفلت برتنے پر برطرف کر دیا ہے۔

ازبک وزارت صحت نے مزید کہا کہ اس نے کچھ ماہرین کے خلاف تادیبی اقدامات کیے ہیں، یہ بتائے بغیر کہ ماہرین کا کیا کردار ہے۔