وزیراعلیٰ سندھ نے کہا ہےکہ پاکستان کی معیشت ترقی کی راہ پر گامزن ہے۔

تفصیلات کے مطابق وزیراعلیٰ سندھ سید مراد علی شاہ سے پاکستان نیوی کے 20 ویں اسٹاف کورس کے شرکاء کی ملاقات ہوئی ہے، وفد کی سربراہی ریئر ایڈمرل جاوید اقبال کمانڈنٹ نے کی۔

  اس موقع پر وزیراعلیٰ سندھ سید مراد علی شاہ نے شرکاء  سے خطاب کرتے ہوئے کہا کہ پاکستان 200 ملین آبادی  کا ملک ہے، 2025 تک ملک کی مڈل کلاس کی آبادی 100 ملین ہوجائے گی جس سے پاکستان مڈل کلاس آبادی  کا بڑا ملک بن جائے گا۔

سید مراد علی شاہ نے کہا کہ پاکستان کی معیشت ترقی کی راہ پر گامزن ہے، اس وقت کچھ معاشی مسائل ہیں جن کو جلد بہتر کیا جائے گا۔

وزیراعلیٰ سندھ نے یہ بھی کہا کہ معیشت کی بہتری کے لیے انفرااسٹرکچر  اور انرجی سیکٹر  میں ترقی ضروری ہے، اس وقت انرجی، تعلیم، ہنری تعلیم،  ہیلتھ کیئر میں سرمایہ کاری  تیزی سے جاری ہے۔

ان کا کہنا تھا کہ سندھ حکومت جولائی اور اگست کے سیلابوں کے باعث مشکل وقت سے گزر رہا ہے، سیلاب کے باعث سندھ میں 801 افراد انتقال کرگئے اور 8442 افراد زخمی ہوئے جبکہ 801 انتقال کرنے والوں میں 339 بچے اور 151 خواتین  شامل ہیں۔

وزیراعلیٰ سندھ سید مراد علی شاہ کا مزید کہنا تھا کہ بارشوں سے 2087186 گھر تباہ  ہوئے، سندھ حکومت نے سیلاب متاثرین میں 873000 خیمے، 3775560 مچھر دانیاں ، 2425318 راشن بیگ  اور 1411416 رضیائیاں تقسیم کی ہیں۔