وزیراعلیٰ سندھ سید مراد علی شاہ نے کہا ہے کہ ملیر ایکسپریس وے کی تعمیر سے شہر سے ٹریفک کا مسئلہ کافی حد تک حل ہو جائے گا۔

وزیراعلیٰ مراد علی شاہ نے ترقیاتی کاموں کے دورے کے بعد گلستان جوہر میں میڈیا سے بات چیت کرتے ہوئے کہا کہ میں نے آج 3 اضلاع کا دورہ کیا ہے۔

 انہوں نے کہا کہ ملیر ایکسپریس وے کورنگی سے شروع ہوکر ملیر میں ختم ہوگا، ملیرایکسپریس وے کی تعمیر سے شہر سے ٹریفک کا مسئلہ کافی حد تک حل ہو جائے گا، ہم اگست میں اس پروجیکٹ کو جزوی طور پرشروع کر دینگے، پھر الیکشن کے بعد انشاء اللہ مکمل پروجیکٹ کا افتتاح کرینگے۔

میں نے آج ریڈ لائن کے جاری منصوبے کا معائنہ کیا

مراد علی شاہ نے کہا کہ میں نے آج ریڈ لائن کے جاری منصوبے کا معائنہ کیا، یہ پاکستان کا واحد پروجیکٹ بغیر سبسڈی کے چلے گا۔

 وزیراعلیٰ سندھ نے کہا کہ گلستان جوہر میں فلائی اوور کا پروجیکٹ اگست کو کھولیں گے، ہمارے کچھ تیار پروجیکٹس ہیں، میں ان کے افتتاح میں دیر کرتا ہوں، مچھلی چوک، ہاکس بے روڈ اور دیگر ٹریٹمنٹ پروجیکٹس بھی تیار ہیں۔

 انکا کہنا ہے کہ میں نے آج شہر کے دورے کے دوران پچ ورک کے احکامات دیے ہیں، کراچی میں ڈرینج کی ریہیبلی ٹیشن کا کام عوام کو نظر آیا ہے، اس وجہ سے بارش کے پانی کی نکاسی باقاعدہ ہوئی ہے۔

ہم نے ورلڈ بینک سے 2 بلین ڈالرز کے پروجیکٹس لئے ہیں

 انہوں نے کہا کہ سیلاب کے باعث صوبے کے 22 اضلاع میں گھروں، فصلوں، اسکولوں او اسپتالوں کی عماتوں کو نقصان ہوا ہے، ہم نے ورلڈ بینک سے 2 بلین ڈالرز کے پروجیکٹس لئے ہیں، گھروں کی تعمیر پر 200 بلین روپے دیے ہیں۔

 وزیراعلیٰ نے کہا کہ سندھ حکومت 60 بلین روپے اور وزیراعظم نے 60 بلین روپے دینے کا وعدہ کیا ہے، ہم گھر کی تعمیر کیلئے 3 لاکھ روپے لوگوں کو دینگے۔

 مراد علی شاہ نے مزید کہا کہ اگر کوئی شخص یا کمپنی بنانا چاہے تو وہ اس پروجیکٹ میں حصہ لے سکتی ہے، ہم آریگیشن کے کام بھی کر رہے ہیں، چیئرمین پیپلز پارٹی بلاول بھٹو بھی بارش متاثرہ علاقوں کا دورہ کرینگے۔

اس موقع پر وزیراعلیٰ سندھ سید مراد علی شاہ نے سندھ اور پورے پاکستان کو نئے سال کی مبارکباد دیتے ہوئے کہا کہ نئے سال میں انشاء اللہ معاشی اور دہشتگردی کے مسائل حل ہونگے۔