جمعیت علمائے اسلام (ف) کے سربراہ مولانا فضل الرحمان نے کہا ہے کہ صوبائی حکومت اور وزیر اعلیٰ کو اربوں روپے کا حساب دینا ہوگا۔

پاکستان ڈیمو کریٹک موومنٹ (پی ڈی ایم) کے سربراہ  مولانا فضل الرحمان نے میں پریس کانفرنس کرتے ہوئے کہا کہ ملک میں بدامنی، معاشی بدحالی، بھتہ خوری سمیت مسائل بڑھ چکے ہیں، آل پارٹیز کانفرنس میں تمام مسائل کو صوبائی حکومت کی ناکامی قرار دیا گیا ہے۔

صوبائی حکومت عوام کے تحفظ اور امن کیلئے اقدامات اٹھائے

انہوں نے کہا کہ صوبے میں نو سال سے قابض حکمرانوں نے غریب صوبے کو مقروض کیا ہے، صوبائی حکومت اور وزیر اعلی کو اربوں روپے کا حساب دینا ہوگا۔

فضل الرحمان نے کہا کہ بی آر ٹی، مالم جبہ اور بلین ٹری سونامی کی تحقیقات کا مطالبہ کرتے ہیں، صوبائی حکومت عوام کے تحفظ اور امن کیلئے اقدامات اٹھائے، صوبائی حکومت سستا آٹے کی فراہمی کو یقینی بنا کر عوام کو ریلیف دے۔

سربراہ پی ڈی ایم نے کہا کہ ہیلی کاپٹر بل صرف عمران خان کو نیب کیسز سے بچانے کیلئے پاس کیا گیا، ذاتی قانون سازی کی مذمت کرتے ہیں۔

پی ٹی آئی کی نااہلی سب کے سامنے آچکی ہے

انکا کہنا ہے کہ پی ٹی آئی کی نااہلی سب کے سامنے آچکی ہے، اب پردہ نہیں ڈال سکتے، اب وہ احتجاج اور لانگ مارچ بھی نہیں کرسکتے۔

انہوں نے کہا کہ ہمیں اندازہ نہیں تھا کہ ہم اس قدر دلدل میں پھنس چکے ہیں، پاکستا بلیک لسٹ ہونے کی طرف جارہا تھا، نئی حکومت کی کوشش کی وجہ سے پاکستان وائٹ لسٹ میں آیا۔

فضل الرحمان نے کہا کہ مرکز پر حملے ہورہے ہیں لیکن ہم اسکی حکمت عملی سے دفاع کررہے ہیں، سوشل میڈیا پر چیزیں چلتی ہیں، ٹیکنوکریٹ حکومت کے حوالے سے کوئی چیز میرے نوٹس میں نہیں۔

پی ٹی آئی حکومت کو پیسا دینا ملک کو غرق کرنے کے برابر ہے

سربراہ پی ڈی ایم کا کہنا ہے کہ سی پیک بڑا منصوبہ تھا گوادر خطے کی گہرائی ہے لیکن ساڑھے تین سال میں اسکو خراب کیا گیا، ان لوگوں نے پاکستان کا معاشی قتل کیا ہے، ملک کو ڈبویا ہے۔

انہوں نے مزید کہا کہ ہم کیسے انکو پیسے دیں، وزیر اعلیٰ روز کہتا ہے کہ اسمبلی توڑونگا، اس حکومت کو پیسا دینا ملک کو غرق کرنے کے برابر ہے، توشہ خانہ سے لیکر توپ خانہ تک چیزیں محفوظ نہیں۔