صدر آزاد جموں وکشمیر بیرسٹر سلطان محمود چوہدری نے کہا ہے کہ برطانوی پارلیمنٹ مسئلہ کشمیر کے حل اور مقبوضہ کشمیر میں جاری انسانی حقوق کی پامالی بند کرانے کے لئے اپنا کردار ادا کرے۔

تفصیلات کے مطابق صدر آزاد جموں وکشمیر بیرسٹر سلطان محمود چوہدری نے ایوان صدر کشمیر ہاؤس اسلام آباد میں کشمیری نژاد برطانوی ہاؤس آف لارڈز کے رکن لارڈ قربان حسین اور برطانوی ممبرپارلیمنٹ عمران حسین سے ملاقات کی ہے۔

اس موقع پر کشمیری نژاد برطانوی ہاؤس آف لارڈز کے رکن لارڈ قربان حسین اور برطانوی ممبرپارلیمنٹ عمران حسین نے صدر آزادجموں وکشمیر بیرسٹر سلطان محمود چوہدری کو برطانیہ کے دورے اور اس موقع پربرطانوی پارلیمنٹ سے خطاب کی بھی دعوت دی جو بیرسٹر سلطان نے قبول کی۔

صدر آزاد جموں وکشمیر نے کہا کہ وہ جلد برطانیہ کا دورہ کریں اور برطانوی پارلیمنٹ کومسئلہ کشمیر اور مقبوضہ کشمیر کی اصل اور تازہ ترین صورتحال پر بریفنگ دیں گے۔

بیرسٹر سلطان چوہدری نے کہا کہ دنیا بھر میں آباد کشمیری تارکین وطن بالخصوص برطانیہ میں آباد کشمیریوں کا مسئلہ کشمیر کو عالمی فورمز پر اُجاگر کرنے میں اہم کردار ہے اور میں اس امر کی امید رکھتا ہوں کہ آپ لوگ برطانوی ہاؤس آف لارڈز اور پارلیمنٹ میں کشمیریوں کا مقدمہ مؤثر اور بھرپور انداز میں پیش کریں گے۔

صدر آزاد جموں وکشمیر کا کہنا تھا کہ میں بھی جلد برطانیہ کا دورہ کر کے ڈیڑھ کروڑ کشمیری عوام کی آواز انٹرنیشنل کمیونٹی تک پہنچانے کے لئے اپنا کردار اد ا کروں گا۔

ان کا یہ بھی کہنا تھا کہ مسئلہ کشمیر کے اصل اور اہم فریق کشمیری عوام ہیں اور اُنہوں نے ہی اپنے مستقبل کا فیصلہ کرنا ہے لہذا انٹرنیشنل کمیونٹی کشمیری عوام کو اُن کا حق خودارادیت دلوانے کے لئے اپنا رول ادا کرے جبکہ برطانوی پارلیمنٹ بھی مسئلہ کشمیر کے حل اور مقبوضہ کشمیر میں جاری انسانی حقوق کی پامالی بند کرانے کے لئے اپنا کردار ادا کرے

انہوں نے کہا کہ پاک بھارت دونوں تیسری دنیا کی ایٹمی طاقتیں ہیں اور دونوں کے درمیان کوئی بھی چھوٹا یا بڑا حادثہ ایک بڑی جنگ کا پیش خیمہ ثابت ہو سکتا ہے جو کہ پوری دنیا کے امن کو اپنی لپیٹ میں لے سکتا ہے لہذا عالمی برادری مسئلہ کشمیر کے حل پر زور دے۔

صدر آزاد جموں وکشمیر بیرسٹر سلطان محمود چوہدری نے مزید کہا کہ برطانوی پارلیمنٹ کشمیری عوام کو اُن کا حق خودارادیت دلانے کے لئے اپنا اثر و رسوخ استعمال کرے اس سلسلے میں کشمیری نژاد برطانوی اراکین پارلیمنٹ اہم رول ادا کر سکتے ہیں لہذا آپ لوگ برطانوی پارلیمنٹ میں مسئلہ کشمیرکے حل اور مقبوضہ کشمیر میں جاری ظلم و بربریت کے خلاف اپنی آواز بلند کریں۔