پرویزالہٰی نے کہا ہے کہ ہمیں ریسکیو 1122 کے افسروں اور اہلکاروں پر فخر ہے۔

تفصیلات کے مطابق وزیراعلیٰ پنجاب چودھری پرویزالہٰی نے فیصل آباد کے گھنٹہ گھر پر چڑھنے والے شخص کو بحفاظت ریسکیو کرنے والے ریسکیو1122 کے عملے کو اپنا مہمان بنا لیا۔

وزیراعلیٰ پنجاب چودھری پرویزالہٰی نے دعوت پر فیصل آباد کے ریسکیورز کی وزیراعلیٰ آفس کا دورہ کیا جہاں انہوں نے شہری کو بحفاظت ریسکیو کرنے والے ریسکیورز کو شاباش دی

اس موقع پر چودھری پرویزالہٰی نے ریسکیو آپریشن کو لیڈ کرنے والے ریسکیور عبدالرحمن کو 5لاکھ روپے کا انعام اورتعریفی سرٹیفکیٹ دیا جبکہ چودھری پرویزالہٰی نے ریسکیو آپریشن میں حصہ لینے و الے دیگر ریسکیورز ارسلان احمد،رفاقت بیگ، فہد امین اور انجینئر احتشام کو بھی ایک ایک لاکھ روپے کا انعام اور تعریفی سرٹیفکیٹس دیئے۔

 وزیراعلیٰ پنجاب چودھری پرویزالہٰی نے کہا کہ آپ نے شہری کو بحفاظت ریسکیو کر کے اپنے پیشہ وارانہ ہونے کا ثبوت دیا ہے،ریسکیو1122 کو آفات یا مشکل وقت میں ہمیشہ سب سے پہلے پہنچنے کا اعزاز حاصل ہے۔

چودھری پرویزالہٰی نے یہ بھی کہا کہ فیصل آباد کے ریسکیورز نے فرض شناسی کی اعلیٰ مثال قائم کی، ہمیں ریسکیو 1122 کے افسروں اور اہلکاروں پر فخر ہے۔

وزیراعلیٰ پنجاب چودھری پرویزالہٰی نے مزید کہا کہ اللہ کی مدد سے میں نے یہ ادارہ بنایا تھا جو آج سایہ دار درخت کی مانند ہے۔

ڈی جی ریسکیو 1122 ڈاکٹر رضوان نصیراور دیگر حکام بھی اس موقع پر موجود تھے۔