ترجمان وزیر اعلیٰ پنجاب فیاض الحسن چوہان نے کہا ہے کہ پاکستان کو بچانے کیلئے عمران خان کو واپس اقتدار میں لانا ہوگا۔

تفصیلات کے مطابق ترجمان وزیر اعلیٰ پنجاب فیاض الحسن چوہان نے وفاقی حکومت کے توانائی بچت پلان پر سخت ردعمل دیتے ہوئے کہا کہ بدترین معاشی حالات میں مارکیٹیں جلد بند کرنا عوام کے معاشی قتل کے مترادف ہے جبکہ نااہل حکومت عوام کو ریلیف دینے کی بجائے انکے کاروبار بند کر رہی ہے۔

انہوں نے کہا کہ معیشت کے آئین سٹائن اسحاق ڈار نے ملک کو دیوالیہ کر دیا ہے جبکہ تیرہ رنگی حکومت بھی عوام کے سامنے بالکل ایکسپوز ہوگئی ہے اور ملکی برآمدات سوا تین ارب سے کم ہو کر سوا دو ارب روپے رہ گئی ہیں۔

یہ بھی پڑھیں؛ لندن میں کھڑا ہو کر کوئی شخص جھوٹ نہیں بول سکتا ، فیاض الحسن چوہان

ان کا کہنا تھا کہ ہمارے دور حکومت میں پاکستان کے ڈیفالٹ کا خطرہ 5 فیصد تھا جو آٹھ ماہ میں 90 فیصد ہوگیا ہے۔

ان کا یہ بھی کہنا تھا کہ امپورٹڈ حکومت نمائشی اقدامات چھوڑے اور اپنے شاہانہ طرز حکومت پر غور کرے، ایک طرف بیروزگاری بڑھ رہی ہے تو دوسری طرف معاشی حالات ابتر ہو چکے ہیں اور اگر جلد الیکشنز نہ ہوئے تو یہ لوگ ملک کو ناچ نوچ کر کھا جائیں گے۔

یہ بھی پڑھیں؛ 13 گیڈر جماعتیں عمران خان کا مقابلہ نہیں کرپا رہیں، فیاض الحسن چوہان

ترجمان وزیر اعلیٰ پنجاب فیاض الحسن چوہان نے مزید کہا کہ اگر پاکستان کو بچانا ہے تو عمران خان کو واپس اقتدار میں لانا ہوگا۔