پاکستان تحریک انصاف (پی ٹی آئی) کے رہنما فواد چوہدری نے کہا کہ الیکشن کمیشن کے فیصلے کیخلاف عدالت جائیں گے۔

سماجی رابطے کی ویب سائٹ ٹوئٹر پر اپنے ایک بیان میں فواد چوہدری نے کہا کہ الیکشن کمیشن کا قابل ضمانت وارنٹ جاری کرنے کا فیصلہ ہائیکورٹ کے فیصلے کی توہین ہے۔

الیکشن کمیشن کا قابل ضمانت وارنٹ جاری کرنے کا فیصلہ ہائیکورٹ کے فیصلے کی توہین ہے، کیس کی تاریخ 17 جنوری گھی جس کو رولز کے خلاف آج مقرر کرکے فیصلہ دیا گیا یہ الیکشن کمیشن کے ان بونے ممبران کا ایک اور جانبدار فیصلہ ہے، اس فیصلے کے خلاف ہائیکورٹ میں توھین عدالت کا مقدمہ کریں گے

— Ch Fawad Hussain (@fawadchaudhry) January 10, 2023

انہوں نے کہا کہ الیکشن کمیشن میں کیس کی سماعت کی تاریخ 17جنوری تھی،  الیکشن کمیشن نے راتوں رات تاریخ تبدیل کر کے رولز کے خلاف آج فیصلہ دے دیا، یہ الیکشن کمیشن کے ان بونے ممبران کا ایک اور جانبدار فیصلہ ہے۔

فواد چوہدری نے مزید کہا کہ الیکشن کمیشن کے وارنٹ کی کوئی قانونی حیثیت نہیں، اس فیصلے کیخلاف عدالت جائیں گے اور توہین عدالت کا مقدمہ کریں گے۔

توہین الیکشن کمیشن کیس، عمران خان کے قابل ضمانت وارنٹ جاری

خیال رہے کہ توہین الیکشن کمیشن کیس میں چیئرمین پی ٹی آئی عمران خان کے قابل ضمانت وارنٹ گرفتاری جاری کردیے گئے ہیں۔

 الیکشن کمیشن آف پاکستان میں توہین الیکشن کمیشن اور الیکشن کمشنر کیس میں سابق وزیراعظم عمران خان، فواد چوہدری اور اسد عمر کی حاضری سے استثنیٰ کی درخواست مسترد کردی ۔

الیکشن کمیشن کے چار رکنی کمیشن نے حاضری سے استثنیٰ کی درخواستوں پر محفوظ فیصلہ سناتے ہوئے عمران خان، اسد عمر اور فواد چوہدری کے قابل ضمانت وارنٹ گرفتاری جاری کردیئے۔

فیصلے کے مطابق عمران خان، اسد عمر اور فواد چوہدری کو 50، 50 ہزار روپے کے مچلکے جمع کرانے کی ہدایت  کی گئی ہے جس کے بعد الیکشن کمیشن نے کیس کی سماعت 17 جنوری تک ملتوی  کردی۔

خیال رہے کہ عمران خان، اسد عمر اور فواد چوہدری کی جانب سے حاضری سے استثنیٰ کی درخواستیں دائر کی گئی تھیں جس پر الیکشن کمیشن نے درخواستوں پر گزشتہ سماعت پر دلائل کے بعد فیصلہ محفوظ کیا تھا۔