کراچی: آٹے کی بڑھتی قیمتوں کو لگام ڈالنے کیلئے سندھ حکومت نے مارکیٹ میں فی کلو آٹا 95 روپے میں فراہم کرنے کا اعلان کردیا ہے۔

وزیرِ اطلاعات سندھ شرجیل انعام میمن اور وزیر خوراک مکیش کمار چاولہ نے فلورملرز کے ہمراہ پریس کانفرنس کرتے ہوئے کہا کہ اوپن مارکیٹ میں آٹا 160 سے کم کر کے 95روپے کلو دیا جائے گا۔

شرجیل میمن نے کہا کہ غریب ومستحق افراد 65روپے کلو والا آٹا خرید سکیں گے، اوپن مارکیٹ میں آٹا سستا کرنے کی کوشش کررہے ہیں۔

سندھ حکومت سستے آٹے کی مد میں اربوں کی سبسڈی دے رہی ہے

صوبائی وزیر نے کہا کہ آٹے کی قیمتیں بہت اوپر گئی ہیں، روزانہ 460ٹرک کراچی میں سستا آٹا فراہم کررہے ہیں، 10 کلو کے6 لاکھ تھیلے روزانہ دے رہے ہیں۔

انہوں نے کہا کہ سندھ حکومت سستے آٹے کی مد میں اربوں کی سبسڈی دے رہی ہے، آٹے کا بحران پورے ملک ہے، سندھ واحد صوبہ ہے جہاں 65روپے کلو آٹامل رہا ہے۔

شرجیل انعام میمن نے مزید کہا کہ سندھ حکومت کے وفاق، ورلڈ بینک کے سامنے مطالبات تھے، ورلڈ بینک 2ارب ڈالر سیلاب متاثرین کیلئے دے گا۔

وزیر خوراک مکیش کمار چاولہ

دوسری جانب مکیش کمار چاولہ نے گفتگو کرتے ہوئے کہا کہ وزیراعلیٰ سندھ اور پی پی قیادت نے آٹے بحران کا نوٹس لیا، پارٹی نے احکامات دیے کہ وجوہات معلوم کریں آٹا کیوں مہنگا ہو رہا ہے؟ فلور مل اونرز کی ڈیمانڈ تھی کے انکا کوٹہ بڑھایا جائے، وزیراعلیٰ کی ہدایت کے بعد فلوملز کا کوٹہ بڑھادیا۔

مزید پڑھیں: گھی، آٹا، تیل سب عوام کی پہنچ سے دور ہونے لگا

انہوں نے کہا کہ غریبوں کے لئے 65 روپے فی کلو کا آٹا ویسے ہی فروخت ہوگا، آج سے تمام تر دکانوں پر 95 روپے فی کلو آٹا ملے گا۔

مکیش کمار نے مزید کہا کہ چھ لاکھ بوریاں سپلائی کررہے ہیں، گندم ہمارے پاس بہت ہے، کل ایک جہاز اترا ایک آج بھی آرہا ہے، ہم مارچ تک اسی ریٹ پر آسانی سے دیں گے۔