وفاقی وزیر داخلہ رانا ثناء اللہ کا کہنا ہے کہ میں پنجاب حکومت واپس لے کر ہی واپس اسلام آباد جاؤں گا۔

وزیر داخلہ رانا ثناء اللہ نے لاہور ہائیکورٹ کے احاطے میں میڈیا سے گفتگو  کرتے ہوئے کہا کہ وزیراعلیٰ کو 20، 22 دن ملے تھے، انہوں نے روزانہ اربوں روپے کی کرپشن کی، ان کی ساری توجہ ماسٹر پلان کی منظوری پر رہی۔

ووٹ کی طاقت سے فتنے کو ختم کریں گے

انہوں نے کہا کہ معزز عدالت نے پرویز الہیٰ کو ریلیف دیا جو پنجاب کی عوام کو بہت مہنگا پڑا، ہماری عدالت سے استدعا ہے کہ اس کیس کا جلد فیصلہ دے تاکہ اقلیتی حکومت عوام پر مسلط نہ رہے۔

رانا ثناء اللہ نے کہا کہ عمران خان ملکی سیاست میں ایک ناسور ہے جس نے لوگوں کو بدتمیزی سکھائی، مجھے افسوس ہے کی میری گاڑی پر جوتا مارا گیا جسے ہمارے کارکنوں نے خوب مارا، لیکن وہ بیچارہ تو مظلوم اور بے شرم انسان کے ہاتھوں گمراہ ہوا تھا، ضرورت اس بات کی ہے کہ اس فتنہ کا خاتمہ کیا جائے۔

رن آف الیکشن میں ہم کامیاب ہوسکتے ہیں

وفاقی وزیر کا کہنا ہے کہ پرویز الہیٰ کے پاس 186 اراکین نہیں ہیں اور وہ کسی صورت اعتماد کا ووٹ نہیں لے سکتے، ہمارے پاس 179 اراکین ہیں اور رن آف الیکشن میں ہم کامیاب ہو سکتے ہیں۔

انہوں نے کہا کہ تحریک انصاف کے اراکین ہمارے ساتھ آنا چاہتے ہیں لیکن سپریم کورٹ کا فیصلہ ان کے آڑے ہے، اب وہ اعتماد کا ووٹ نہ دے کر اپنے غم و غصے کا اظہار کر رہے ہیں۔

رانا ثناء اللہ نے مزید کہا کہ سلیمان شہباز کی جہانگیر ترین سے پہلی ملاقات نہیں ہے، وہ پہلے بھی ایسی ملاقاتیں کرتے رہے ہیں، حمزہ شہباز اپنی والدہ کی عیادت کے لئے بیرون ملک میں مقیم ہیں۔