سندھ کابینہ نے کراچی اور حیدرآباد میں حلقہ بندیوں کا نوٹیفکیشن واپس لے لیا ہے جس سے متعلق الیکشن کمیشن کو مراسلہ ارسال کردیا گیا ہے۔

ذرائع کے مطابق  کراچی میں سندھ حکومت کی جانب سے بلدیاتی الیکشن ملتوی کرنے کے اعلان کے بعد وزیراعلیٰ سندھ مراد علی شاہ کی گزشتہ شب متحدہ قومی موومنٹ (ایم کیو ایم)  کے وفد سے ملاقات کی اندرونی کہانی سامنے آگئی ہے۔

MQM وفد کی وزیر اعلیٰ ہاؤس آمد
کراچی بلدیاتی انتخابات ملتوی
بڑے فیصلے کا انتظار#BOLNews #MQM pic.twitter.com/FeX4bV5pPM

— BOL Network (@BOLNETWORK) January 12, 2023

ذرائع کا کہنا ہے کہ وزیراعلیٰ سندھ مراد علی شاہ نے ایم کیو ایم وفد کا وزیراعلیٰ ہاؤس میں خود استقبال کیا۔

ملاقات میں وزیراعلیٰ سندھ نے ایم کیو ایم وفد سے گفتگو کرتے ہوئے کہا کہ سندھ کابینہ نے کراچی اور  حیدر آباد کی حلقہ بندیوں کا نوٹیفکیشن واپس لے لیا ہے، ایم کیو ایم ہماری اتحادی ہے ساتھ لیکر چلیں گے۔

یہ بھی پڑھیں: بلدیاتی انتخابات نہیں ہونے دیں گے، تمام دھڑوں کے انضمام کے بعد ایم کیو ایم کا اعلان

ذرائع نے بتایا کہ اس فیصلے پر ایم کیو ایم وفد نے سندھ حکومت بالخصوص بلاول بھٹو زرداری اور آصف زرداری کا شکریہ ادا کیا
اور اس دوران  فاروق ستار نے کہا کہ آصف زرداری نے وعدہ کیا وہ پورا کیا۔

ذرائع کے مطابق سندھ حکومت کا حلقہ بندیوں سے متعلق واپس لیا گیا نوٹیفکیشن ایم کیو ایم وفد کے حوالے کردیا گیا ہے۔

ذرائع نے بتایا کہ ایم کیو ایم پاکستان نے احتجاج کی کال واپس لے لی، ایم کیو ایم وفد نے وزیراعلیٰ سندھ کو احتجاج کی کال واپس لینے سے متعلق آگاہ کردیا۔

یہ بھی پڑھیں؛ کراچی اور حیدرآباد میں 15 جنوری کو الیکشن نہیں ہونگے، شرجیل انعام میمن

خیال رہے کہ گزشتہ شب سندھ حکومت کی جانب سے بلدیاتی الیکشن ملتوی کرنے کے اعلان کے بعد وزیراعلیٰ سندھ سید مراد علی شاہ سے متحدہ کے وفد فاروق ستار کی سربراہی میں ملاقات ہوئی جس میں فیصل سبزواری، مصطفیٰ کمال، وسیم اختر اور جاوید حنیف شامل تھے۔

علاوہ ازیں ملاقات میں وزیراعلیٰ سندھ کے ہمراہ ناصر شاہ، شرجیل میمن، مرتضیٰ وہاب، قاسم نوید، مکیش چاولہ اور تیمور تالپور شریک تھے۔

ملاقات کے بعد ایم کیو ایم وفد وزیراعلیٰ ہاؤس سے روانہ ہوگیا تھا۔