ایم کیوایم پاکستان کے رہنماؤں کا کہنا ہے کہ کراچی اور حیدرآباد میں آج ہونے والے بلدیاتی انتخابات میں انتہائی کم ٹرن آوٹ نے ثابت کردیا کہ بلدیاتی انتخابات غلط تھے اور یوں عوام نے پری پولنگ مسترد کردی۔

بہادر آباد میں متحدہ قومی موومنٹ (ایم کیو ایم) پاکستان کے کنوینئر خالد مقبول صدیقی نے سینئر رہنما فاروق ستار اور مصطفیٰ کمال کے ہمراہ پریس کانفرنس کرتے ہوئے کہا کہ آج کراچی میں دھاندلی ہار گئی اور کراچی جیت گیا، عوام نے گھر بیٹھ کر ایم کیوایم کے فیصلے پر ریفرنڈم دے دیا۔

انہوں نے کہا کہ کراچی اور حیدرآباد میں انتخابات سے قبل دھاندلی کو عوام نے مسترد کیا، عوام نے کراچی کے مینڈیٹ کو چرانےکی سازش کو مسترد کر دیا جب کہ الیکشن کمیشن نے ایک بار پھر جانبداری کا مظاہرہ کیا، اگر ایک ادارہ شفاف الیکشن نہیں کرواسکتا تو اس کی کوئی ضرورت نہیں۔

یہ بھی پڑھیں؛ ایم کیو ایم کا بلدیاتی انتخابات کے بائیکاٹ کا اعلان

خالد مقبول صدیقی نے کہا کہ ایم کیو ایم کی انتخابی سیاست ایوانوں کی مرہون منت نہیں کیونکہ ہم عوام کے دلوں میں بستے ہیں۔ اس الیکشن کوکوئی قبول نہیں کرے گا، اس انتخابات کی کوئی اخلاقی حیثیت نہیں، اب سوال یہ اٹھتا ہے کہ کیا منتخب ہونے والے میئر کو لوگ قبول کریں گے؟

اس موقع پر اس موقع پر فاروق ستار نے خالد مقبول صدیقی کے مؤقف کی تائید کرتے ہوئے کہا کہ عوام کے حقوق پر کوئی سمجھونہ نہیں کریں گے جب کہ کراچی شہر کے مسائل کے حل کے لیے جدوجہد جاری رکھیں گے۔

فاروق ستار کا کہنا تھا کہ جب وسیم اختر کے دور کے آخری دن تھے تو حلقہ بندیاں کی جاتیں، کراچی سب کا ہے مگرسب کراچی کے بھی بنیں،  آپ لوگوں نے کراچی کو لوٹ کا مال سمجھا ہوا ہے۔

واضح رہے کہ ایم کیو ایم پاکستان کی جانب سے حلقہ بندیوں پر اپنے تحفظات کا اظہار کیا تھا تاہم سندھ حکومت نے ان کے تحفظات کو دور نہیں کیا جس پر بلدیاتی انتخابات سے دو دن قبل ایم کیو ایمنے وفاقی حکومت سے علحیدگی کی دھمکی دی اور آخری لمحات میں الیکشن کے بائیکاٹ کا اعلان کردیا۔