صوبائی الیکشن کمشنرسندھ اعجاز انور چوہان کا کہنا ہے کہ شام تک بلدیاتی انتخابات کے نتائج تیار کرلیے جائیں گے۔

تفصیلات کے مطابق سندھ کے مختلف اضلاع میں 15 جنوری کوہونے والے بلدیاتی انتخابات کے دوسرے مرحلے کے انعقاد کے بعد کراچی میں میڈیا کو بریفنگ دیتے ہوئے صوبائی الیکشن کمشنراعجازانورچوہان نے کہا کہ کراچی کی 246 یونین کمیٹیز کے نتائج تیار کیے جارہے ہیں، شام تک بلدیاتی انتخابات کے نتائج تیار کرلیے جائیں گے۔

صوبائی الیکشن کمشنراعجازانورچوہان نے میڈیا کو بریفنگ میں بتایا کہ بلدیاتی انتخابات کا دوسرا مرحلہ پرامن رہا۔ بلدیاتی انتخابات میں بہت سے چیلنجز تھے۔ الیکشن کمیشن نے آئنی ذمے داری احسن طریقے سے نبھائی۔

صوبائی الیکشن کمشنرسندھ نے بتایا کہ نتائج کے اعلان میں تاخیر کرنے کی خبریں مل رہی تھیں۔ پولنگ اسٹیشن کے احاطے میں ووٹرزکو ووٹ ڈالنے کی اجازت دی۔ بہت سے پولنگ اسٹیشنز میں چھ بجے تک پولنگ ہوئی۔ گنتی کا عمل کہیں 7 اور کہیں 9 بجے شروع ہوا۔

اعجازانور چوہان نے کہا کہ کراچی میں 246 یونین کمیٹیز ہیں۔ کراچی میں ہرآراو کے پاس پانچ سے چھ یونین کمیٹیز تھیں۔ ہریونین کمیٹی کا فارم 11 اور 12 بننے میں وقت لگا۔ تقریبا 3600 یونین کمیٹیز، میونسپل اور ٹاؤن کمیٹیز ہیں۔

صوبائی الیکشن کمشنرسندھ نے میڈیا کو بریفنگ میں بتایا کہ کراچی میں 4990 پولنگ اسٹیشنز تھے۔ جن پر57 ریٹرننگ افسران نے خدمات انجام دیں۔ ہریونین کمیٹی میں 5 حلقے بنائے گئے تھے۔ شام تک 246 یونین کمیٹیز کے نتائج کا اعلان ہو جائے گا۔

انھوں نے مذید کہا کہ چیف الیکشن کمشنر کی ہدایت پر سیکریٹری الیکشن کمیشن کراچی آئے، بلدیاتی انتخابات شفاف بنانے کی ہدایت کی گئی تھیں۔ کسی افسر نے بھی بلدیاتی انتخابات میں بے ضابطگی نہیں کی، اگرکسی افسر نے کوتاہی کی تو اس کے خلاف کارروائی کی جائے گی۔

 دوسری جانب جماعت اسلامی اور پیپلزپارٹی نے کراچی میں بلدیاتی انتخابات میں اپنی اپنی برتری کے دعوے کردیے ہیں۔