مسلم لیگ ق کے صدر چوہدری شجاعت حسین نے چوہدری پرویز الہٰی کو شوکاز نوٹس جاری کر دیا۔ 

تفصیلات کے مطابق مسلم لیگ ق کے صدرچوہدری شجاعت حسین نے پارٹی کے صوبائی صدر اور وزیراعلیٰ پنجاب چوہدری پرویز الہیٰ کی پارٹی رکنیت معطل کردی۔

چوہدری شجاعت حسین نے پرویز الہیٰ کو شوکاز نوٹس بھی جاری کردیا۔  شو کاز نوٹس کے مطابق رات کو چلنے والی خبروں کے حوالے سے مرکزی صدر پاکستان مسلم لیگ چوہدری شجاعت حسین نے ہنگامی اجلاس طلب کیا۔

یہ بھی پڑھیں؛ ق لیگ کا پی ٹی آئی میں ضم ہونے کا حتمی فیصلہ

اجلاس میں مرکزی سیکریٹری جنرل طارق بشیر چیمہ، سینئر نائب صدر پاکستان مسلم لیگ چوہدری سالک حسین اور سینئر رہنماء پاکستان مسلم لیگ چو ہدری شافع حسین نے شرکت کی۔

اجلاس میں شرکاء نے اس اقدام کا سختی سے نوٹس لیا کہ صوبائی صدر پارٹی کو کسی دوسری جماعت میں ضم نہیں کرسکتا لہذا اس غیر آئینی اور غیر قانونی اقدام کی وضاحت مانگی جاتی ہے،  اگر شوکاز کا جواب نہیں دیا گیا تو پارٹی کارروائی کرے گی۔

نوٹس میں کہا گیا کہ پاکستان مسلم لیگ بحثیت سیاسی جماعت اپنا تشخص، ووٹ بنک، پارٹی ڈسپلن اور منشور وضابطہ رکھتی ہے،  آپ کے خلاف پارٹی آئین کے آرٹیکل نمبر 16 اور آرٹیکل نمبر 50 کے تحت کاروائی عمل میں لائی جائے گی اور آپ کی وضاحت تک آپکی پارٹی کی بنیادی رکنیت معطل کر دی جاتی ہے۔

واضح رہے کہ چوہدری پرویز الہیٰ نے اپنی جماعت کو پی ٹی آئی میں ضم کرنے کے حوالے سے پارٹی اراکین سے مشاورت مکمل کرلی اس حوالے سے وہ جلد ہی اعلان کریں گے۔