الیکشن کمیشن آف پاکستان نے 271 اراکین پارلیمنٹ کی رکنیت معطل کردی۔

تفصیلات کے مطابق الیکشن کمیشن نے سالانہ گوشواروں کی تفصیلات جمع نہ کروانے والے سینیٹ کے 21، قومی اسمبلی کے 136 ارکان کی رکنیت معطل کردی۔

ذرائع الیکشن کمیشن نے بتایا کہ سندھ اسمبلی کے 48 اور خیبرپختونخوا کے 54 اور بلوچستان اسمبلی کے 12 اراکین اسمبلی کی رکنیت معطل کی گئی ہے۔

الیکشن کمیشن کا کہنا ہے کہ معطل ممبران اسمبلی کے اجلاسوں میں شریک نہیں ہوسکیں گے اور اعتماد کے ووٹ سمیت قانون سازی میں بھی معطل ممبران شریک نہیں ہوسکیں گے۔

یہ بھی پڑھیں؛ الیکشن کمیشن کے پاس اب کوئی راستہ نہیں

اس حوالے سے الیکشن کمیشن اسپیکر اسمبلی اور چیئرمین سینیٹ کو معطل ممبران کی فہرست بھجوائے گا۔

جن ارکان قومی اسمبلی رکنیت معطل کی گئی ان میں احسن اقبال، تاج حیدر، فواد چوہدری، مراد سعید، زرتاج گل، طارق بشیر چیمہ، اسد عمر، عمر ایوب، نوید قمر  شامل ہیں۔

اس کے علاوہ سینیٹر شوکت ترین، عبدالغفورحیدری، سینیٹر احمد خان کی رکنیت بھی معطل کی گئی ہے۔

الیکشن کمیشن کے مطابق ثانیہ نشتر، انوار الحق کاکڑ، اسد قیصر، عمر ایوب، نور عالم خان، شہر یار آفریدی،  نورالحق قادری، غلام سرور خان، خواجہ آصف، محسن رانجھا، شفقت محمود، فہمیدہ مرزا، علی زیدی، کنول شوزف، عندلیب عباس کی رکنیت بھی معطل کی گئی ہے۔