وزیراعلیٰ پنجاب چودھری پرویز الٰہی نے کہا ہے کہ آئندہ کے لائحہ عمل کیلئے مشاورت کا آغاز کر دیا ہے، اتفاق رائے سے فیصلہ کریں گے۔

تفصیلات کے مطابق وزیراعلیٰ پنجاب چودھری پرویز الٰہی کی زیر صدارت مسلم لیگ قائداعظم کا مشاورتی اجلاس ہوا جس میں پاکستان تحریک انصاف کے ساتھ ضم ہونے کے حوالے سے تفصیلی مشاورت کی گئی اور شرکاء نے پی ٹی آئی کے ساتھ ضم ہونے کے حوالے سے بھی اپنی تجاویز پیش کیں۔

 اجلاس نے چودھری پرویزالٰہی کی قیادت پر مکمل اعتماد کا اظہار کیا اور تمام فیصلوں کا اختیار چودھری پرویزالٰہی کوتفویض کر دیا گیا۔

اجلاس میں مسلم لیگ ق کے  اجلاس میں مشاورتی عمل کو مزید بڑھانے کا فیصلہ کیا گیا جبک ضلع کی سطح پر پارٹی عہدیداران سے بھی مشاورت کرنے، تمام ضلعی عہدیداران کے اجلاس منعقد کرنے اور مسلم لیگ ہاؤس میں بھی عہدیداران کا اجلاس بلانے کا فیصلہ کیا گیا۔

یہ بھی پڑھیں؛ چودھری پرویز الٰہی کی ماحول دوست ہائبرڈ بسوں کی خریداری کے عمل کو تیز کرنے کی ہدایت

چودھری پرویزالٰہی خود بھی عہدیداران سے خطاب کریں گے جبکہ خواتین ونگ پنجاب کی صدر خدیجہ فاروقی خواتین عہدیداران کے ساتھ مشاورتی عمل کا آغاز کریں گی اور وکلا ونگ، لیبر ونگ، اقلیتی ونگ، یوتھ ونگ، علماء، کسان، کلچر، تاجر، ڈاکٹر سمیت تمام ونگز کے ساتھ مشاورت کی جائے گی۔

 اس موقع پر مسلم لیگ قائداعظم کے مشاورتی اجلاس میں شریک تمام عہدیداران نے اعلان کیا کہ وزیر اعلیٰ پنجاب چودھری پرویزالٰہی ہمارے لیڈر ہیں، ہم ان کے ساتھ کھڑے ہیں اور کھڑے رہیں گے۔

 مسلم لیگی عہدیدار کا کہنا تھا کہ پوری سیاسی اور عوامی قوت کے ساتھ چودھری پرویزالٰہی کے شانہ بشانہ ہیں۔

یہ بھی پڑھیں؛ عمران خان جیسا لیڈر نہیں ملے گا، چودھری پرویز الٰہی

مسلم لیگی عہدیدار کا مزید کہنا تھا کہ چودھری پرویزالٰہی کی قیادت میں مسلم لیگ قائداعظم اور پی ٹی آئی کے مثالی اتحاد نے صوبے کے عوام کو حقیقی معنوں میں ڈیلیور کیا ہے۔

اس موقع پر وزیراعلیٰ پنجاب چودھری پرویز الٰہی نے کہا کہ آئندہ کے لائحہ عمل کیلئے مشاورت کا آغاز کر دیا ہے، اتفاق رائے سے فیصلہ کریں گے۔

 اجلاس میں مسلم لیگ قائداعظم کے الیکٹورل کالج کے تمام عہدیدار، چودھری وجاہت حسین، حسین الٰہی ایم این اے، سینیٹر کامل علی آغا، حافظ عمار یاسر، باؤ رضوان، شجاعت نواز اجنالہ، عبداللہ یوسف، ساجد احمد خان بھٹی، ڈاکٹر افضل، چودھری احسان الحق، میاں عمران مسعود، باسمہ چودھری، خدیجہ فاروقی سمیت خرم منور منج اور ایاز خان نیازی بھی شریک تھے۔