پیپلز پارٹی کے سینئر رہنما و سندھ کے صوبائی وزیر سعید غنی نے کہا ہے کہ ہم چاہتے ہیں کہ پیپلز پارٹی اور جماعت اسلامی مل کر کام کریں۔

تفصیلات کے مطابق صوبائی وزیر سعید غنی نے امیر جماعت اسلامی کراچی حافظ نعیم الرحمان کے ہمراہ میڈیا سے گفتگو کرتے ہوئے کہا کہ وزیر اعلیٰ سندھ سید مراد علی شاہ کے کہنے پر ادارہ نورحق آئے ہیں، ہم چاہتے ہیں کہ پیپلز پارٹی اور جماعت اسلامی مل کر شہری اداروں کو ٹھیک کریں۔

جماعت اسلامی کو بلدیاتی انتخابات کے حوالے سے تحفظات ہیں

سعید غنی نے کہا کہ جماعت اسلامی کو بلدیاتی انتخابات کے حوالے سے تحفظات ہیں، ہم نے یقین دہانی کرائی ہے کہ جس مسئلے پر سندھ حکومت کا کردار بنتا ہے وہ ہم کریں گے، جن مسائل پر جماعت اسلامی نے قانون کا دروازہ کھٹکھٹایا ہے اس پر ہم کوئی رکاوٹ نہیں ڈالیں گے۔

ان کا کہنا تھا کہ جن یوسیز پر الیکشن کمیشن نے ایکشن لیا ہے وہ جو فیصلہ کریں گے ہم قبول کریں گے۔

اس موقع پر امیر جماعت اسلامی کراچی حافظ نعیم الرحمن نے بھی میڈیا سے گفتگو کرتے ہوئے کہا کہ پیپلز پارٹی کا وفد ادارہ نور حق میں تشریف لائے ہیں اور بلدیاتی انتخابات کے حوالے سے تبادلہ خیال ہوا ہے، بلدیاتی انتخابات کے حوالے سے شدید تحفظات ہیں۔

حافظ نعیم نے کہا کہ پیپلز پارٹی نے یقین دہانی کرائی ہے کہ ہم تحفظات دور کریں گے، ری کاونٹنگ ابھی بھی جاری ہے، ہم نے الیکشن کمیشن کو انتخابات میں ہونے والی دھاندلی پر درخواست بھی درج کروا دی ہے، الیکشن کمیشن نے درخواست منظور کرلی ہے۔

ان کا کہنا تھا کہ ری کاونٹنگ لیگل پراسس ہے لیکن لیگل طریقے سے ال لیگل کام ہو رہے ہیں، ہم توقع کرتے ہیں کہ تحفظات دور ہوں گے تو ہم بات کریں گے۔

یہ بھی پڑھیں؛ جماعت اسلامی کے ساتھ بلدیاتی سیٹ اپ بنانے کیلئے تیار ہیں، سعید غنی