وزیراعلٰی پنجاب چوہدری پرویزالٰہی کا کہنا ہے کہ نگراں وزیراعلٰی کی نامزدگی کیلئے اپوزیشن کا رویہ غیرسنجیدہ ہے۔

تفصیلات کے مطابق وزیرعلیٰ پنجاب چودھری پرویزالٰہی کی زیرصدارت اعلی سطح کا مشاورتی اجلاس منعقد ہوا۔ اسپیکرپنجاب اسمبلی محمد سبطین خان، سینیٹر شبلی فراز، راجہ بشارت، ہاشم جواں بخت اورمیاں اسلم اقبال نے اجلاس میں شرکت کی۔

اجلاس میں نگران وزیراعلیٰ کی نامزدگی کے حوالے سے مشاورت اور سیاسی صورتحال پر تفصیلی تبادلہ خیال اورنگران وزیراعلیٰ کے لئے قائم کمیٹی نے اپوزیشن کے عدم تعاون کے حوالے سے آگاہ کیا۔

دورانِ اجلاس چوہدری پرویز الٰہی نے کہا کہ نگران وزیراعلیٰ کی نامزدگی کیلئے اپوزیشن کا رویہ غیر سنجیدہ ہے۔ اپوزیشن نے ایک بار پھرنگران وزیراعلیٰ کی نامزدگی کے حوالے سے معاملات کو متنازع بنایا ہے۔

چودھری پرویزالٰہی نے کہا کہ اپوزیشن کا رویہ ناقابل فہم اورسیاسی ناپختگی کے مترادف ہے۔ نگران وزیراعلیٰ کی نامزدگی پر سیاست کرنے والوں کوشرم آنی چاہیے۔ ہم نے کھلے دل سے نگران وزیراعلیٰ کیلئے بہترین شخصیات کے نام دیے۔

انھوں نے کہا کہ قوم دیکھ رہی ہے کہ نگران وزیراعلیٰ کے معاملے کو بلاوجہ کون طول دے رہا ہے۔ ہماری کمیٹی کے ممبران راجہ بشارت، میاں اسلم اقبال اورہاشم جواں بخت سینئرسیاستدان ہیں اورسنجیدگی سے مذاکرات چاہتے ہیں۔

چودھری پرویزالٰہی نے مذید کہا کہ افسوس کی بات ہے کہ اپوزیشن نے ہمارے اچھے رویے کے باوجودمنفی طرزعمل اپنایا۔ ہم چاہتے ہیں کہ ایسا نگران وزیراعلیٰ آئے جو شفاف اورصاف انداز میں نگران حکومت کے امور کو آگے بڑھائے۔