پشاور: نگراں وزیراعلیٰ خیبرپختونخوا کی تقرری کے معاملے پر وزیراعلیٰ محمود خان نے اپوزیشن لیڈر سے رابطہ نہ کرنے کا فیصلہ کیا ہے۔

اس حوالے سے ذرائع کا کہنا ہے کہ اپوزیشن لیڈر اکرم خان درانی نے بھی وزیراعلیٰ محمود خان کے ساتھ وزیراعلیٰ ہاؤس میں نہ بھیٹنے کا کہا تھا۔

ذرائع کے مطابق وزیراعلیٰ خیبرپختونخوا محمود خان نے نگراں وزیراعلیٰ کی تقرری کیلئے اجلاس طلب کرلیا ہے جس میں رہنما پی ٹی آئی شوکت یوسفزئی اور دیگر اہم پارٹی رہنما شرکت کریں گے۔

دوسری جانب پاکستان تحریک انصاف کے رہنما  شوکت یوسفزئی نے کہا کہ وزیراعلیٰ محمود خان نے اکرم درانی سے رابطہ نہیں کریں گے، اکرم درانی نے بطور اپوزیشن لیڈر کوئی کردار ادا نہیں کیا تھا، اس لئے وزیراعلیٰ انہیں خط نہیں لکھیں گے۔

شوکت یوسفزئی نے مزید کہا کہ آج اجلاس میں نگراں وزیراعلی کے ناموں کو حتمی شکل دیں گے، نگراں وزیراعلی کے لئے ہم اپنے نام پارلیمانی کمیٹی کو بھیجیں گے۔

واضح رہے کہ پنجاب اسمبلی کے بعد خیبر پختونخوا اسمبلی بھی تحلیل کردی گئی ہے۔

گورنر خیبرپختونخوا حاجی غلام علی نے خیبرپختونخوا اسمبلی تحلیل کرنے کی سمری پر دستخط کر دیے تھے جس کے بعد خیبر پختونخوا کی کابینہ بھی تحلیل ہوگئی تھی۔

اسمبلی کی تحلیل کے بعد گورنر کی محمود خان کو نئے وزیراعلیٰ کی تقرری تک کام کرنے کی ہدایت کی گئی ہے جس کے لئے اپوزیشن لیڈر سے مشاورت کی جائے گی۔

خیبرپختونخوا اسمبلی تحلیل ہونے کا اعلامیہ جاری

دوسری جانب وزیراعلیٰ خیبرپختونخوا نے دو روز قبل ایڈوائس میں صوبائی اسمبلی کو تحلیل کرنے کا مشورہ دیا جس کے بعد گورنر خیبرپختونخوا نے وزیراعلیٰ کی جانب سے بھیجے گئے ایڈوائس پر دستخط کردیے۔

آئین کے آرٹیکل 224-A کی شق (4) کے مطابق، موجودہ وزیر اعلیٰ، محمود خان نگراں وزیر اعلیٰ کی تقرری تک صوبے کے روز مرہ کے امور انجام دینے کے لیے اپنے عہدے پر فائز رہیں گے۔

 اعلامیے کے مطابق نگراں وزیر اعلیٰ کا تقرر گورنر کی طرف سے وزیر اعلیٰ اور سبکدوش ہونے والی صوبائی اسمبلی میں قائد حزب اختلاف کی مشاورت سے تین دن کی مقررہ مدت کے اندر کرنا ہے۔

جاری کردہ اعلامیے میں بتایا گیا تھا کہ گورنر کا دفتر مذکورہ مدت کے ختم ہونے تک بغیر کسی رسمی تقرری کے مشاورت کے لیے دستیاب ہوگا۔