کراچی کی انتظامیہ اور ٹریفک پولیس نے پاکستان سپر لیگ (پی ایس ایل) 2020 کے میچز کے لیے ٹریفک پلان جاری کردیا۔

واضح رہے کہ پی ایس ایل 5 کا آغاز 20 فروری (جمعرات) سے کراچی کے نیشنل اسٹیڈیم سے ہوگا۔

اسی سلسلے میں شہری انتظامیہ اور ٹریفک پولیس نے ٹریفک پلان جاری کیا تاکہ اسٹیڈیم آنے والے افراد کو مشکلات کا سامنا نہ کرنا پڑے۔

ٹریفک پولیس حکام کے مطابق اسٹیڈیم آنے والے شائقین کو پارکنگ کیلئے اصل شناختی کارڈ اور ٹکٹ دکھا لازمی ہوگا، پارکنگ کیلئے خاص پوائنٹس مختص ہوں گے۔

ضلع وسطی اور غربی کے شہریوں کیلئے یونیورسٹی روڈ پر پارکنگ ہو گی جہاں سے شائقین کو شٹل سروس کے ذریعے ایکسپو سینٹر تک لایا جائے گا۔

علاوہ ازیں یونیورسٹی روڈ سے داخل ہونے والی گاڑیوں کو نیوٹاؤن چورنگی کے موڑ سے اسٹیڈیم روڈ جانے کی اجازت نہیں ہوگی، ایسے تمام ٹریفک کو جیل روڈ، شہید ملت یا سیدھا پیپلز چورنگی کی طرف موڑ دیا جائے گا۔

ٹریفک پولیس کے مطابق ڈالمیا کے قریب غریب نواز فٹبال گراؤنڈ کو بھی پارکنگ میں تبدیل کیا جائے گا جبکہ ضلع جنوبی اور اولڈ سٹی ایریا سے آئے شائقین کیلئے ایکسپو سینٹر گیٹ نمبر1 کے قریب پارکنگ ہو گی۔

آغاخان ہسپتال کے قریب رعنا لیاقت علی گرلز کالج کا میدان بھی پارکنگ پوائنٹ ہوگا۔

اسی طرح سہراب گوٹ سے نیپا، لیاقت آباد نمبر 10 سے حسن اسکوائر، پیپلز چورنگی سے یونیورسٹی روڈ کی طرف ہیوی ٹریفک کی اجازت نہیں ہوگی۔

دوسری طرف شارع فیصل سے براستہ کارساز نیشنل اسٹیڈیم آنے والے ٹریفک کیلئے راستہ بند ہوگا۔ متبادل شاہراہوں پر میچز کے اوقات میں ہیوی ٹریفک کا داخلہ ممنوع ہوگا۔

اسی طرح جو لوگ میچ دیکھنے کے لیے آنا چاہیں گے انہیں اس طرف سے ٹکٹس دیکھنے کے بعد آنے دیا جائے گا جبکہ ٹریفک پولیس ان کی مدد کے لیے موجود ہوگی۔