آئی جی پنجاب ڈاکٹر عثمان انور نے کہا ہے کہ جس کا جو جمہوری حق ہے وہ ضرور کرے لیکن قانون کو توڑنے کی کسی کو اجازت نہیں ہوگی  اور کوئی بھی چیز قانون کی حکمرانی سے بالاتر نہیں ہوگی۔

تفصیلات کے مطابق آئی جی پنجاب ڈاکٹر عثمان انور نے عہدے کا چارج سنبھال لیا  ہے  جس کے بعد میڈیا سے گفتگو  کرتے ہوئے ان کا کہنا تھا کہ چن چن کر لگائے جانے والے افسران وفاقی حکومت کے ملازم ہیں تقرروتبادلے وفاقی و صوبائی حکومتیں کرتی ہے  ۔

یہ بھی پڑھیں: ڈاکٹر عثمان انور نئے آئی جی پنجاب تعینات

ترجیحات:

انہوں نے کہا کہ پہلی ترجیح شفاف الیکشن کا انعقاد ہے جبکہ دوسری ترجیح دہشت گردی کی لہر سے صوبے کو محفوظ بنانا ہے اور تیسری ترجیح جرائم کی شرح میں کمی لانا پولیس ریسپانس بہتر بنانا ہے۔

انہوں نے مزید کہا کہ جیسا ریسپانس آفتاب چیمہ کے دور میں تھا ویسا کرنے کی کوشش کریں گے، ڈاکہ پڑنے کے بعد ہم متاثرہ شخص کو کہہ کر چلے جاتے ہیں کہ تھانے آجائیں حالانکہ مدعی کو مقدمہ کی کاپی گھر پر میسر کی جاسکتی ہے۔

عمران خان حملہ کیس

آئی جی پنجاب کا کہنا تھا کہ ادارہ حکومت کے ماتحت ہوتا ہے  اور حکومت ہی جے آئی ٹی بناتی ہے لیکن عمران خان حملہ کیس کی جے آئی ٹی پر قانون جو کہے گا اس کے مطابق تفتیش ہوگی۔

سائبر کرائم بہت بڑا ایشو ہے

ان کا کہنا تھا کہ سائبر کرائم بہت بڑا ایشو ہے جس کے حل کے لئے ایف آئی اے کے ساتھ مل کر کام کرنا بہت ضروری ہے۔

انہوں نے بتایا کہ ہراسمنٹ اور آن لائن فراڈ سے بچانے کے لیے اقدامات کریں گے۔

خیال رہے کہ عثمان انور گزشتہ پانچ سالوں میں دسویں آئی جی پنجاب تعینات ہوئے ہیں۔

عثمان انور ان دنوں بطور ایڈیشنل آئی جی موٹر وے پولیس فرائض سر انجام رہے تھے جبکہ عثمان انور کا شمار پاکستان پولیس سروس کے انتہائی پروفیشنل، ایماندار اور فرض شناس افسران میں ہوتا ہے۔

عثمان انور کا تعلق پاکستان پولیس سروس کے تئیسویں کامن سے ہے، انہوں نے 1995 میں بطور اے ایس پی پولیس سروس جوائن کی تھی اور وہ اس سے قبل پنجاب میں ایڈیشنل آئی جی سپیشل برانچ کے عہدے پر بھی تعینات رہ چکے ہیں۔

عثمان انور سی ٹی ڈی پنجاب، ایس ایس پی آپریشنز فیصل آباد، سی آئی ڈی اور چیف ٹریفک آفیسر راولپنڈی بھی تعینات رہ چکے ہیں۔