نگران وزیر اعلیٰ خیبر پختونخوا محمد اعظم خان نے کہا ہے کہ امن و امان کے سلسلے میں پولیس کا کردار قابل ستائش ہے۔

تفصیلات کے مطابق نگران وزیر اعلیٰ خیبر پختونخوا محمد اعظم خان کی زیر صدارت صوبے کی امن و امان، معاشی صورتحال اور مالی مسائل سے متعلق اجلاس ہوا جس میں نگران وزیر اعلیٰ کو متعلقہ حکام کی جانب سے صوبے کو درپیش مالی مسائل اور امن کی تازہ صورتحال کے بارے تفصیلی بریفنگ دی گئی۔

اس موقع پر نگران وزیر اعلیٰ نے صوبے کو درپیش مالی مسائل اور امن و امان سے متعلق معاملات وزیر اعظم کے ساتھ اٹھانے کا فیصلہ کیا۔

اجلاس کی صدارت کرتے ہوئے نگران وزیر اعلیٰ خیبر پختونخوا محمد اعظم خان نے کہا کہ اگلے چند دنوں میں وزیر اعظم کے ساتھ ملاقات کرکے یہ ایشوز اٹھائے جائیں گے جبکہ صوبے کے لئے یہ دونوں ایشوز انتہائی اہم ہیں اور نگران صوبائی حکومت ان ایشور پر خصوصی توجہ دے گی۔

انہوں نے کہا کہ اس سلسلے میں وفاقی حکومت سے ہر ممکن تعاون حاصل کرنے کی کوشش کی جائے گی۔

ان کا کہنا تھا کہ صوبے میں آئے روز امن و امان کے بڑھتے ہوئے واقعات اور پولیس پر حملے تشویشناک ہیں۔

ان کا یہ بھی کہنا تھا کہ صوبے میں امن و امان کی صورتحال کو خاطر خواہ حد تک بہتر بنانے کے لئے تمام دستیاب وسائل بروئے کار لائے جائیں گے جبکہ صوبے کے معروضی حالات کے تناظر میں پولیس اور سی ٹی ڈی کو مستحکم کرنے اور اسے جدید آلات سے لیس کرنے کے لئے وفاق سے بات بھی کی جائے گی۔

اجلاس میں سابق عوامی نمائندوں، سابق بیوروکریٹس اور دیگر شخصیات کی سکیورٹی کے لئے پولیس گارڈز کی تعیناتی کے موجودہ نظام پر نظر ثانی کرنے کا فیصلہ کیا گیا۔

اس موقع پر متعلقہ حکام کو اس سلسلے میں نئی پالیسی تشکیل کے لئے تجاویز پیش کرنے کی ہدایت دی گئی اور ان شخصیات کے ساتھ غیر ضروری طور پر تعینات اضافی پولیس اہلکاروں کو واپس بلانے کی تجویز بھی کی گئی۔

نگران وزیر اعلیٰ کو بریفنگ دیتے ہوئے کہا گیا کہ اس وقت چار ہزار سے زائد پولیس اہلکار مختلف شخصیات کی سکیورٹی پر تعینات ہیں۔

محمد اعظم خان نے کہا کہ جن افراد کو واقعتاً سکیورٹی کی ضرورت ہو، انہیں پولیس گارڈز فراہم کیا جائے گا۔

انہوں نے کہا کہ سکیورٹی کی موجودہ صورتحال میں ہم افراد کو غیر ضروری پولیس گارڈز فراہم کرنے کے متحمل نہیں ہوسکتے ہیں۔

ان کا کہنا تھا کہ صوبے میں امن و امان کے سلسلے میں پولیس کا کردار قابل ستائش ہے جبکہ صوبے کے عوام بھی پولیس کی قربانیوں کو قدر کی نگاہ سے دیکھتے ہیں۔

نگران وزیر اعلیٰ خیبر پختونخوا محمد اعظم خان نے مزید کہا کہ عوام اپنے ارد گرد شرپسند عناصر پر کڑی نظر رکھیں اور شہری اس سلسلے میں پولیس کے ساتھ بھر پور تعاون کرکے ذمہ دار شہری ہونے کا ثبوت دیں۔