وفاقی وزیر ریلوے شیخ رشید احمد نے کہا ہے کہ سپریم کورٹ کے حکم  پر پاکستان کے سب سے بڑے شہر کراچی میں سرکلر ریلوے ٹریک سے 30 دن میں قبضے ختم کرائیں گے ۔

 تفصیلات کے مطابق  کراچی میں پریس کانفرنس کرتے ہوئے وفاقی وزیر ریلوے شیخ رشید احمد نے کہا کہ سندھ اور وفاقی حکومت ملکر کراچی سرکلر ریلوے بحال کریں گی۔

وفاقی وزیر ریلوے نے کہا کہ کراچی میں ریلوے کی زمین 140 فٹ ہے مگر پہلے فیز میں 50 فٹ تک قبضہ ختم کرا رہے ہیں کیونکہ یہ یقین رکھنا ہے کہ یہ زمین ریلوے کی ہے ۔

شیخ رشید احمد نے یہ بھی کہا کہ ہم پہلے مرحلے میں 4 کلومیٹر کی زمین پر قبضہ ختم کرائیں گے جبکہ  اگلے مرحلے میں متاثرین کو زمین یا کیش کے طور بحال کرنے کا فیصلہ کیا جائے گا۔

وفاقی وزیر ریلوے کا کہنا تھا کہ یہ باتیں غلط ہے کہ سندھ اور وفاق کے درمیان اختلاف ہیں، ہم کے سی آر پر ساتھ کھڑے ہیں جبکہ  ہم نے ایک کمیٹی بنانے کا بھی فیصلہ کیا ہےجس میں گریڈ 19 سے گریڈ 21 کے افسر مقرر ہونگے۔

 شیخ رشید احمد کا یہ بھی کہنا تھا کہ پاکستان مسلم لیگ ن کی رہنما مریم نواز باہر نہیں جارہی ہیں لیکن عدالت ان کے باہر جانے کے حوالے سے کوئی فیصلہ کرے تو وہ اس پر دیکھیں گے۔

حکومت مہنگائی کی روک تھام کے لئے اقدامات کررہی ہے، شیخ رشید احمد

وفاقی وزیر ریلوے  نے کہا کہ ملک میں چینی اور آٹے کا بحران ضرور پیدا ہوا ہے اور عمران خان اس بات کو تسلیم کرچکے ہیں، عمران خان وہ پہلے وزیر اعظم ہیں جنہوں نے حکومت کی کوتاہی تسلیم کی ہے۔

 شیخ رشید احمد نے یہ بھی کہا کہ پنجاب کی فرانزک لیب کی رپورٹ نے میری بات سچ ثابت کردی کہ لیاقت پور میں ٹرین میں آگ سلنڈر پھٹنے سے لگی تھی، سلنڈر پہلے پھٹا یا شارٹ سرکٹ ہوا، لیکن ثابت ہوچکا ہے کہ آگ سلنڈر سے لگی یہ کوتاہی ریلوے کی تھی۔

شیخ رشید کا کہنا تھا کہ پاکستان مسلم لیگ نواز اور پاکستان پیپلز پارٹی حکومت کے خلاف مارچ  نہیں کریں گی،مولانا فضل الرحمان نے مارچ کیا تو اب  کی بار ان کے ساتھ  وی آئی پی سلوک نہیں ہوگا۔

وفاقی وزیر ریلوے شیخ رشید احمد کا مزید کہنا تھا  کہ جتنے مرضی مارچ کرلیں، عمران خان کہیں نہیں جا رہے ، حکومت اپنی 5 سالہ آئینی مدت پوری کرے گی۔