ماہر قانون فیصل چوہدری نے کہا ہے کہ فواد چوہدری کے جسمانی ریمانڈ کی استدعا مسترد ہونا ہماری جیت ہے۔

پاکستان تحریک انصاف (پی ٹی آئی) کے وکیل فیصل چوہدری نے اسلام آباد میں میڈیا سے گفتگو کرتے ہوئے کہا کہ فواد چوہدری کی ضمانت کی درخواست دائر کر رہے ہیں۔

انہوں نے کہا کہ حکومت اعظم سواتی طرز پر دور دراز علاقوں میں پرچے کرے گی، مقدمہ اگر بھارت میں بھی ہوگا تو جاکر لڑیں گے۔

فیصل چوہدری نے کہا کہ میڈیا کا مشکل وقت میں یکجہتی پر مشکور ہوں اور سپریم کورٹ بار ایسوسی ایشن کے شکر گزار ہیں، سپریم کورٹ بار ایسوسی ایشن ہمارے ساتھ کھڑی ہوئی۔

ماہر قانون فیصل چوہدری نے مزید کہا کہ آئین کے مطابق 90روز میں انتخابات ہونے چاہئیں۔

اہلیہ فواد چوہدری کی گفتگو

دوسری جانب فواد چوہدری کی اہلیہ حبا نے بھی میڈیا سے گفتگو کرتے ہوئے کہا کہ میڈیا کی دل سے شکر گزار ہوں، پرویزالہیٰ نے ہم سے فون پر معذرت کرلی ہے۔

حبا چوہدری نے مزید کہا کہ مجھے شدید ذہنی ٹارچر کیا گیا، ہمارے حوصلے بلند ہیں ڈرنے والے نہیں، ہم ادھر ہی ہیں فواد چوہدری کو رہا کروا لیں گے، مخالفین کے لیے میں اکیلی کافی ہوں۔

 بابر اعوان کی گفتگو

اس سے قبل تحریک انصاف کے رہنما ڈاکٹر بابر اعوان نے اسلام آباد میں میڈیا سے گفتگو کرتے ہوئے کہا تھا کہ چند تھانے داروں نے ملک کو تباہ کردیا، بھارت اتنا آگے چلا گیا اور ہم کہاں جارہے ہیں؟

انہوں نے کہا کہ سپریم کورٹ کے وکیل کے منہ پر کپڑا ڈالنا کہاں کا انصاف ہے؟ کلبھوشن یادیو کے منہ پر کپڑا ڈالا، ہتھکڑی لگانے کی ہمت کی؟ کلبھوشن یادیو سے کبھی پوچھا تمہارے پیچھے مودی ہے؟

الیکشن کمیشن کو پوری قوم کیخلاف بغاوت کے مقدمے درج کرنے ہونگے

بابر اعوان نے کہا کہ الیکشن کمیشن کو پوری قوم کیخلاف بغاوت کے مقدمے درج کرنے ہونگے، پاکستان میں بڑی جیل بنا کر سب کو قیدیوں میں شمار کرلیں۔

124 اے اور 505کے کیس میں آرمی شکایت کرسکتی ہے، الیکشن کمیشن کی تحلیل کاریفرنس بن سکتا ہے، حکومت کا کام الیکشن کمیشن کررہا ہے، سیکریٹری الیکشن کمیشن خود کو حکومت سمجھتے ہیں، 124 اے اور 505 اس کیس میں نہیں لگتے۔

انتظامی شب خون مارنے کی کوشش کی گئی

پی ٹی آئی رہنما نے کہا کہ فواد چوہدری کیخلاف ایف آئی آر اسلام آباد میں درج ہوئی اور لاہور سے اغوا کیا گیا، فوادچوہدری کو اغوا کرنے والوں کیخلاف مقدمہ درج کرائیں گے۔

یہ بھی پڑھیں: سپریم کورٹ بار کا فواد چوہدری کی فوری رہائی کا مطالبہ

انکا کہنا ہے کہ آئین کے مطابق وفاقی اور صوبائی حکومت درخواست دائر کرسکتی ہے، آئین کے مطابق الیکشن کمیشن عدالت ہے نہ ٹریبونل، سرکارنے کہا الیکشن کمیشن کی توہین کی گئی۔

واضح رہے کہ سابق وفاقی وزیر اور پاکستان تحریک انصاف کے سینئر رہنما فواد چوہدری کے مزید جسمانی ریمانڈ کی استدعا مسترد کردی گئی ہے۔