اعلان دستبرداری: یہ مضمون فلم ’مشن مجنو‘ کی کہانی کے بارے میں نہیں ہے۔ اس کے بجائے، یہ آر ایس ایس کے حمایت یافتہ فلم سازوں کے بارے میں ہے جو سچائی کی قیمت پر قوم پرستی کو فروغ دینے کے لیے اسلامو فوبیا کا شکار ہیں

کیمرہ سدھارتھ ملہوترا کے چہرے کو زوم کرتا ہے، جو دوسرے لوگوں کے ساتھ مسجد میں نماز ادا کر رہا ہے۔ نماز سے فارغ ہو کر سب ایک دوسرے سے مصافحہ کرنے لگتے ہیں۔ مسجد کو پاکستانی جھنڈوں سے سجایا گیا ہے اور کہیں کہیں مجھے سادہ سبز جھنڈے بھی نظر آئے، جبکہ نمازی اب بھی پس منظر میں ہاتھ ملا رہے ہیں۔ نماز کی ٹوپی پہنے، ایک چیک والا مفلر اور تیل والا چہرہ، دوسری طرف سدھارتھ ملہوترا اپنے ساتھیوں کو سلام کرتا ہے اور دو مولویوں کے پاس جاکر ان سے نوکری کی درخواست کرتا ہے۔ وہ ادھورا سا لگتا ہے جیسے برسوں سے نہایا نہ ہو۔

تاہم، میں اس کہانی کی مزید گہرائی میں نہیں جاؤں گی کہ سازش کتنی کمزور تھی، ایک سبز قبر کو ایک نیوکلیئر ہاؤس کے طور پر دکھانے سے لے کر پوری فلم میں مکمل طور پر غلط اور گمراہ کن معلومات فراہم کرنے تک جہاں پاکستان خفیہ اور ’غیر قانونی‘ طور پر ایٹم بم بنا رہا ہے۔ لیکن میں قارئین سے درخواست کروں گی کہ وہ مجھ سے ہمدردی کریں کیونکہ میں ان لوگوں میں شامل ہوں جنہوں نے اپنی زندگی کے دو گھنٹے سے زیادہ اس بے معنی فلم کو دیکھنے میں ضائع کر دیے ہیں، جو کہ قوم پرستی یا جس کا مقصد ’سچائی سے پردہ اٹھانا‘، خصوصاً مسلمانوں کے بارے میں بننے والی کسی بھی دوسری ہندوستانی فلم کی طرح کچرے کا ایک تھیلا ہے۔

یہ سچ ہے کہ فلمیں، چاہے وہ کسی بھی ملک میں بنی ہوں، ایک ذہنیت کی تشکیل کرتی ہیں اور ناظرین پر گہرا اثر ڈالتی ہیں۔ اسی طرح، کہانی سنانا ایک مشکل کام ہے کیونکہ یہ ناظرین پر ایک تاثر چھوڑتا ہے۔ اس جدید دور میں جب ممالک چاند کی سیر کر رہے ہیں، بھارت 2023ء میں بھی اپنے کوکون سے باہر نہیں نکلا ہے اور اب بھی پاکستانیوں کو ایک وحشی قوم، غلیظ نظر آنے والے دہشت گردوں اور انڈر ورلڈ کے غنڈوں کے طور پر پیش کرنے پر تلا ہوا ہے، جبکہ عرب کے لوگوں کو تیل اور پیسے کا سودا کرنے والے صرف ایک امیر شیخ کے طور پر دکھایا گیا ہے۔ اس کے باوجود، جب مسلمانوں کو تیسرے درجے کے شہریوں کے طور پر عام کرنے کی بات آتی ہے تو ہندوستانی فلم ساز کسی سے پیچھے نہیں ہیں، اور وہ ایسا کیوں نہیں کریں گے؟ ہندوستان ایک ایسا ملک ہے جس میں ذات پات پر مبنی ایک شرمناک سماجی نظام ہے، جو برہمنوں، کھتریوں، ویشیوں اور شودروں میں تقسیم ہے۔ آخرالذکر تو ان کی پیدائش کے وقت سے پہ داغدار ہوتے ہیں اور اس طرح ان کے ساتھ حقارت اور نفرت کا سلوک کیا جاتا ہے۔

13 فیصد سے زیادہ مسلم آبادی کے ساتھ، ہندوستان میں دنیا کے کسی بھی دوسرے ملک کے مقابلے میں مسلمانوں کی سب سے زیادہ تعداد ہے۔ اقلیتی آبادی کی اتنی بڑی تعداد کا مسکن ہونے کے باوجود جب بات اس کی اقلیتوں کی ہو تو ہندوستان ایک پسماندہ ریاست ہے۔ مزید یہ کہ ہندوستانی فلموں میں مسلمانوں خصوصاً پاکستان کے مسلمانوں کی تصویر کشی اس قدر غیر حقیقی ہے کہ ہدایت کار اور فلمساز مسلمانوں کے کرداروں کو مضحکہ خیزشکل میں پیش کرنے کا سہارا لیتے ہیں۔ کاجل کے ساتھ، تیل والے چہرے اور بالوں، چیک مفلر اور تعویذ کے ساتھ مسلمانوں کو پیش کرنے کا ان کا جنون بالکل ناقابل فہم ہے۔

اگر ہم پیچھے مڑ کر دیکھیں تو بھارت میں پروپیگنڈہ پر مبنی فلمیں بنانے کا ایک ثابت شدہ ٹریک ریکارڈ ہے جو کہ قوم پرستی کی حمایت کرتا ہے، جیسا کہ فلموں ’غلام مصطفیٰ‘، ’فنا‘، ’ایجنٹ ونود‘ اور بے شمار میں دکھایا گیا ہے۔ یہ اس حقیقت کی نشاندہی کرتا ہے کہ ہندوستانی فلم انڈسٹری صرف تخلیقی صلاحیتوں کی آڑ میں پروپیگنڈہ کرنے میں سبقت لے سکتی ہے، خاص طور پر جب بات مسلمانوں کو بالعموم اور پاکستانیوں کو بالخصوص پیش کرنے کی ہو۔

واضح طور پر اس کے برعکس، ہندوستان کے پاس سب سے زیادہ سفاک قوم ہونے کا ایک واضح ریکارڈ رہا ہے جو اسلاموفوبیا کو دوام بخشتا ہے اور تمام مرکزی دھارے کے ذرائع ابلاغ کو استعمال کرکے ایک مسلم مخالف بیانیہ تیار کرنے کے لیے ایک اضافی میل طے کرتا ہے۔

ہندوستانی سنیما دیکھتے ہوئے میں نے محسوس کیا ہے کہ ہندوستان بذات خود ایک اسلامو فوبک ملک ہے اور ہندو اکثریتی سرزمین میں ایک انچ بھی سیکولرازم نہیں ہے۔ فلم ’مشن مجنو‘ اس کی تازہ ترین مثال ہے جس نے دنیا کو بالی ووڈ کے ساتھ ساتھ اس کی مایوپک سوچ پر بھی ہنسایا۔ اس سے انکار نہیں کیا جاسکتا ہے کہ آج کی سب سے بڑی فلمی صنعتوں میں سے ایک ہونے کے ناطے، بالی ووڈ کے ناظرین دنیا کے ہر کونے میں موجود ہیں اور اس طرح ہندوستانی فلمیں عالمی سطح پر پہنچتی ہیں۔

آرٹ اظہار کی ایک شکل ہے جہاں کسی کو اپنے تخیل کو آزاد ہونے کا موقع دینا ہوتا ہے اور بیانیے کو پیچیدہ اور حقیقت میں غلط بنانے کے بجائے اس کے حقیقی معنی کو بیان کرنے اور اسے سامنے لانے کے لیے غیر جانبدارانہ طریقہ استعمال کرنا ہوتا ہے۔ جیسا کہ عامر خان کی فلم ’تھری ایڈیٹس‘ کے مشہور کردار ’رینچو‘ کا کہنا ہے کہ ’’سرکس کا شیر بھی کوڑے کے خوف سے کرسی پر بیٹھنا سیکھ لیتا ہے۔ لیکن آپ ایسے شیر کو اچھا پڑھا لکھا نہیں بلکہ اچھا تربیت یافتہ کہتے ہیں۔‘‘ یہ سطور وزیر اعظم نریندر مودی کی قیادت والی بی جے پی حکومت پر بالکل مضمر ہے، کیونکہ پوری ریاستی مشینری ایسے ہدایت کاروں، ڈرامہ نگاروں، اسکرین رائٹرز اور پروڈیوسروں کو سپورٹ کر رہی ہے جو ’اچھے تربیت یافتہ‘ ہیں اور نریندر مودی کے کوڑے پر برتاؤ کرنا جانتے ہیں۔ تاہم، یہ وقت ہے کہ ایک ’اچھے پڑھے لکھے لوگ‘ بنیں، بھارتی حکومت کے ساتھ ساتھ ملک کے کی بورڈ جنگجوؤں کو خوش کرنے کے لیے فلمیں بنانے کے بجائے کچھ ذہانت پر مبنی مواد اور حقیقت پر مبنی دلچسپ کہانیاں سامنے لائیں۔

جیسا کہ اس وقت حالات ہیں، ہندوستانی سنیما میں متعدد فلمیں ایسی ہیں جو مسلم نوابوں اور مغلوں کے گرد گھومتی ہیں۔ تاہم، فلمی بیانیہ بدل گیا ہے جیسا کہ ’پدماوت (2018ء)‘ اور ’پانی پت (2019ء)‘ جیسی حالیہ فلموں میں دکھایا گیا ہے جہاں ہندوستانی فلم سازوں نے مسلمانوں کو ہارے ہوئے ولن اور شریر شخصیات جب کہ ہندوؤں کو فاتح کے طور پر پیش کرکے حقائق اور تاریخ کو بدلنے کی کوشش کی۔

ویب سیریز ’سیوک‘ ایک ایسی مثال ہے جہاں کچھ بھی زبردستی نہیں کیا جاتا، چاہے وہ اس کے کردار ہوں، عکاسی ہو، مقامات ہوں یا اس کے کرداروں کی تصویر کشی ہو۔ ہر چیز اصلی اور فطری لگ رہی تھی کیونکہ ’سیوک‘ ایک اچھی تحقیق شدہ پیداوار تھی۔ حالانکہ بھارت نے ملک میں سیریز پر پابندی عائد کر رکھی ہے لیکن اس نے دنیا بھر میں دھوم مچا دی ہے۔ ہندوستانی فلموں میں مسلمانوں کی مجموعی نمائندگی بدتر سے بدتر ہوتی چلی گئی ہے اور 90ء کی دہائی میں آر ایس ایس اور بی جے پی کے کارکنوں کی طرف سے جو مسلم مخالف بیانیہ متحرک کیا گیا تھا، وہ بے لگام دکھائی دیتا ہے۔

ہندوستانی سنیما کی مسلسل ہندوتوانائزیشن کی بدولت ہندوستانی مسلمانوں کے خلاف نفرت کی بڑھتی ہوئی لہر نے حالیہ برسوں میں شدت اختیار کی ہے اور اب اپنے عروج پر پہنچ چکی ہے۔

مختصراً، میں قارئین سے ’مشن مجنو‘ دیکھنے کی سفارش نہیں کروں گی۔ ہاں مگر، فلم کو صرف ایک مزاحیہ تھرلر کے طور پر دیکھا جا سکتا ہے تاکہ آپ زوردار قہقہے لگا سکیں، نیٹ فلکس انڈیا کی طرف سے اس کا مزاحیہ اردو ترجمہ سنیں اور ہر اس چیز کا مذاق اڑائیں جو مضحکہ خیز اور احمقانہ طور پر ناقابل فہم ہے۔ فیصلہ آپ کا ہے۔