ملک بھر میں ایک کے بعد ایک نیا بحران جاری ہیں جس کی وجہ سے ملک کے مختلف شہروں میں پیٹرولیم مصنوعات کی شدید قلت پیدا ہو گئی ہے۔

تفصیلات کے مطابق ملک میں پیٹرول کی قلت کا بحران سر اٹھانے لگا ہے، مختلف شہروں میں پیٹرولیم مصنوعات کی قلت ہوگئی، پیٹرول کی قیمتوں میں ممکنہ اضافے کے باعث کئی شہروں میں مالکان پیٹرول پمپ بند کر کے بیٹھ گئے، جس کے باعث عوام کو مشکلات کا سامنا ہے۔

ملک بھر میں ایک کے بعد ایک شدید بحران، پیٹرولیم مصنوعات کی قلت اور اسکا سدباب،مختلف شہروں میں پیٹرولیم مصنوعات کی شدید قلت پیدا ہو گئی ہے۔#BOLNews #InflationInPak pic.twitter.com/K14MP83pB0

— BOL Network (@BOLNETWORK) January 28, 2023

پنجاب

پنجاب کے مختلف کے شہر میلسی، گردونواح، رحیم یار خان اور بہاولپور میں تمام پیٹرول پمپ بند کردیے گئے ہیں۔

پیٹرول پمپ مالکان نے قیمتوں میں اضافے کے امکان کے باعث پیٹرول اور ڈیزل کی فروخت مکمل بند کردی ہے۔

شہری پیٹرول اور ڈیزل کے حصول کیلئے خوار ہونے لگے، پیٹرول نہ ملنے کی وجہ سے سفر کرنے والے مسافروں کو شدید مشکلات کا سامنا کرنا پڑ رہا ہے۔

پیٹرول پمپ انتظامیہ کا کہنا ہے کہ کل اضافی قیمتوں کے ساتھ پیٹرول اور ڈیزل فروخت کیا جائے گا جبکہ پیٹرول پمپ مالکان کے سامنے انتظامیہ خاموش تماشائی بن کر رہ گئی۔

لاہور

دوسری جانب لاہور شہر میں پمپ بند ہونے کی وجہ سے شہری پریشان ہیں جبکہ جو پیٹرول پمپ کھلے ہیں وہاں مالکان نے پمپ کھولے ہوئے ہیں وہ دو ہزار روپے سے زائد کا پیٹرول فراہم نہیں کررہے۔ بعض پیڑول مالکان نے سپلائی یاریٹ بڑھنے کے پیش نظر پمپ بند کردیے۔

پیٹرول کم دینے پر پمپ انتطامیہ اور گاہکوں کے درمیان تکرار ہوئی جبکہ اس تمام تر صورتحال کے باوجود ضلعی انتظامیہ لاہور خاموش تماشائی بنے ہوئے ہیں۔

فیصل آباد

علاوہ ازیں فیصل آباد شہر کے بیشتر پیٹرول پمپ مالکان نے بھی پیٹرول مصنوعی قلت کر دی۔

پٹرولیم مصنوعات کی قیمتوں میں اضافہ کا سنتے ہی عوام نے پٹرول پمپس کا رخ کرنا شروع کر دیا، پیٹرول پمپس پر پٹرول کے حصول کے لیے گاڑیوں کی لمبی قطاریں لگ گئیں۔

راولپنڈی

راولپنڈی شہر کی اہم شاہراہوں مری روڈ، مال روڈ، ائیرپورٹ پر متعدد پیٹرول پمپس کو مالکان نے بند کردیا ہے، جبکہ پیٹرول کی تلاش میں شہری مارے مارے پھر رہے ہیں۔

بند پمپس پر موجود عملے نے بتایا کہ پیٹرول کی قیمتوں میں ممکنہ اضافے کو دیکھتے ہوئے پیٹرول پمپس کو مالکان نے بند کیا ہے۔

واضح رہے کہ پیٹرول کی تلاش میں پھرنے والے شہریوں نے حکومت سے مطالبہ کیا ہے کہ ایسے موقع پرست پیٹرول پمپس مالکان کے خلاف سخت ایکشن لیا جائے۔

شہریوں کا کہنا ہے کہ عوام کیلئے ہر چیز کا حصول مشکل ہوگیا ہے، پیٹرول مہنگا ہونے کے باوجود ہمیں مل نہیں رہا۔

چیئرمین پیٹرولیم ڈیلرز ایسوسی ایشن

چیئرمین پیٹرولیم ڈیلرز ایسوسی ایشن عبد السمیع خان کا کہنا ہے کہ شہر میں کوئی پیٹرول پمپ بند نہیں ہیں، آئل مارکیٹنگ کمپنیز کی جانب سے پیٹرول کی مطلوبہ فراہمی میں کمی کا سامنا ہے۔

چیئرمین پی پی ڈی اے نے کہا کہ پیٹرول کی 4 سے 5 دن میں پیٹرول کی قلت ہوسکتی ہے، ہم حکومت سے کہہ چکے ہیں پیٹرول درآمد کریں وہ سنتے نہیں ہیں۔