نگران وزیر اعلیٰ خیبر پختونخوا محمد اعظم خان نے کہا ہے کہ پشاور مسجد دھماکے میں شہید ہونے والے شہداء کے لئے جلد پیکج کا اعلان کیا جائے گا۔

نگران وزیراعلیٰ کے پی محمد اعظم خان نے پشاور میں دھماکے سے متعلق بریفنگ دیتے ہوئے کہا کہ پہلی بار ایسے موقع پر ملنا دکھ کی بات ہے۔

انہوں نے بتایا کہ گزشتہ روز وزیراعظم کے ساتھ میٹنگ میں تھا، وزیراعظم کو بتا رہا تھا کہ صوبے میں دہشتگردی بڑھ رہی ہے فنڈز ریلیز کریں۔

صوبائی حکومت شہداء کے لواحقین کو تنہا نہیں چھوڑے گی

اعظم خان نے کہا کہ شہداء کے لواحقین کے غم میں برابر کے شریک ہیں، صوبائی حکومت شہداء کے لواحقین کو تنہا نہیں چھوڑے گی، واقعے کے زخمیوں اور شہداء کے لواحقین کو ہر ممکن معاونت فراہم کی جائے گی۔

انکا کہنا ہے کہ شہداء کے لواحقین اور زخمیوں کو معاوضوں کی ادائیگی کے لئے سمری تیار ہے، پولیس لائنز دھماکے میں 95 شہید جبکہ 221 افراد زخمی ہوئے، یہ ہمارے لیے بڑا صدمہ ہے، عوام حوصلہ بلند رکھیں، انشاء اللہ حالات معمول پر آئیں گے۔

نگران وزیراعلیٰ نے کہا کہ بدقسمتی سے صوبے میں اس طرح واقعات پہلے بھی ہوتے رہے ہیں،  صوبے کے عوام نے ماضی میں بھی ایسے حالات کا ڈٹ کر مقابلہ کیا ہے۔

انہوں نے کہا کہ صوبے کی طرف سے یقین دلاتا ہوں کہ شہداء اور غازیوں کو پوری سپورٹ دیں گے، آئی جی صاحب سے کہا ہے جو مدد ضرورت ہو وہ صوبائی حکومت دے گی۔

الیکشن کے ساتھ دھماکے کا کوئی تعلق نہیں

اعظم خان نے کہا کہ الیکشن کے ساتھ دھماکے کا کوئی تعلق نہیں، الیکشن کے اعلان سے قبل ڈی آئی خان اور دیگر علاقوں میں واقعات رونما ہوئے۔ حالات پورے ریجن میں خراب ہے مشکلات کا سامنا کرنا ہوگا۔

نگران وزیراعلیٰ نے مزید کہا کہ میرے چھوٹے بھائی عباس خان پولیس میں تھے، سروس میں بھی پولیس کے ساتھ قریبی تعلق رہا ہے اس طرح کے واقعات سے پولیس کا مورال پست نہیں ہوگا۔