ایک ٹانگ پر کھڑے ہونے کو زیادہ جسمانی سرگرمیوں کے ساتھ ساتھ گرنے کے خطرے میں کمی سے منسک کیا جاتا ہے۔

کم از کم 10 سیکنڈ یا اس سے زیادہ وقت تک بغیر کسی سہارے کے ایک ٹانگ پر کھڑے رہنے سے اچھی صحت کا عندیہ ملتا ہے جبکہ جسمانی فٹنس بھی ظاہر ہوتی ہے۔

ایک ٹانگ پر 10 سیکنڈ سے کم وقت تک کھڑے رہنے میں ناکامی سے عندیہ ملتا ہے کہ دماغ کی چھوٹی شریانوں کو نقصان پہنچ چکا ہے، اسی طرح یہ ناکامی جسمانی توازن میں خرابی کی نشاندہی بھی کرتی ہے۔

ایک حالیہ تحقیق کے مطابق اگر آپ کو ایک ٹانگ پر کھڑے ہونے میں مشکلات کا سامنا ہوتا ہے تو یہ محض جسمانی فٹنس میں کمی نہیں بلکہ کسی سنگین طبی مسئلے کی ایک نشانی بھی ہوسکتی ہے۔

یہ بھی پڑھیں: سائنسدانوں نے شہروں میں گرمی کو کم کرنے کا آسان حل پیش کر دیا

تحقیق میں بتایا گیا کہ اگر درمیانی عمر کے افراد ایک ٹانگ پر 10 سیکنڈ تک توازن برقرار نہ رکھ سکیں تو اگلے 10 برسوں میں کسی بھی بیماری سے موت کا خطرہ دیگر کے مقابلے میں لگ بھگ دگنا زیادہ ہوتا ہے۔

اس تحقیق میں 51 سے 75 سال کی عمر کے 1702 افراد کو شامل کیا گیا تھا اور ان کی صحت کا جائزہ 2008 سے 2020 تک لیا گیا۔

اس موقع پر ہر 5 میں سے ایک فرد (21 فیصد) ٹیسٹ میں ناکام رہا، آئندہ 10 برسوں میں اس گروپ کے 123 افراد مختلف وجوہات کے باعث انتقال کرگئے۔

یہ بھی پڑھیں: الٹرا پروسیسڈ غذائیں ذہنی پسماندگی کو بڑھا سکتی ہیں، تحقیق

تمام تر عناصر (عمر، جنس اور پہلے سے کسی بیماری سے متاثر ہونا وغیرہ) کو مدنظر رکھنے کے بعد محققین نے دریافت کیا کہ ایک ٹانگ پر 10 سیکنڈ تک کھڑے رہنے میں ناکامی سے آئندہ چند برسوں میں کسی بھی وجہ سے موت کا خطرہ 84 فیصد تک بڑھ جاتا ہے۔

یہ بھی پڑھیں: کم عمری میں مایوسی اور افسردگی عارضہ قلب کا سبب بن سکتی ہے، تحقیق