ٹائی ٹینک فلم کے ڈائریکٹر نے 25 سال بعد فلم سے متعلق اہم انکشاف کردیا ہے۔

ہالی ووڈ فلم ٹائی ٹینک میں ہیروئین (کیٹ ونسلیٹ) ایک لکڑی کے تختے پر چڑھ کر بچ جاتی ہے جبکہ ہیرو (لیونارڈو ڈی کیپریو) اس تختے کو پکڑ کر برفیلے پانی میں تیرتے ہوئے ہلاک ہوجاتا ہے۔

فلم کو اب 25 سال مکمل ہوگئے ہیں مگر اب بھی لوگوں کی جانب سے یہ سوال سامنے آتا ہے کہ جب روز (ہیروئین) کو بچایا جاسکتا تھا تو جیک (ہیرو) کو اس تختے پر جگہ دے کر زندہ کیوں نہیں رکھا گیا۔

اسی سوال سے متعلق فلم کے ڈائریکٹر جیمز کیمرون کا کہنا ہے کہ ٹائی ٹینک کے اختتام پر دکھائے جانے والے تختے میں 2 افراد چڑھ کر زندہ نہیں بچ سکتے تھے۔

یہ بھی پڑھیں: ٹائی ٹینک کا ملبہ دیکھنے کیلئے خاتون نے 2 کروڑ روپے خرچ کر دیے

انہوں نے کہا کہ ہم نے ایک سائنسی تحقیق اس لیے کی تاکہ اس بحث کا خاتمہ ہوسکے، ہم نے ایک ماہر کے ساتھ باقاعدہ فرانزک تجزیہ کیا اور اس بارے میں ہم فروری 2023 میں کچھ خاص ریلیز کرنے والے ہیں۔

ان کا کہنا تھا کہ ہم نے تجزیے کے لیے 2 افراد کی خدمات حاصل کیں جن کا جسمانی حجم کیٹ ونسلیٹ اور لیونارڈو ڈی کیپریو جیسا تھا اور ان کے جسم میں متعدد سنسرز نصب کیے گئے۔

ڈائریکٹر جیمز کیمرون نے بتایا کہ اس کے بعد ہم نے برفانی پانی میں متعدد طریقوں کی آزمائش کر کے یہ جاننے کی کوشش کی کہ وہ دونوں تختے پر زندہ رہ سکتے تھے یا نہیں، نتائج سے واضح ہوا کہ صرف ایک ہی زندہ بچ سکتا تھا۔

یہ بھی پڑھیں:  110 سال قبل ڈوبنے والے ٹائیٹینک کی گھڑی نیلام؛ رقم جان کر حیران ہوجائیں گے

ان کا مزید کہنا تھا کہ جیک کو مرنے کی ضرورت تھی، یہ فلم محبت اور قربانی کے گرد گھومتی تھی اور محبت کا پیمانہ قربانی تھی۔