ہانگ کانگ کی حکومت نے مملکت میں سیاحت کو فروغ دینے کے لیے پانچ لاکھ مفٹ ٹکٹس دینے کا اعلان کیا ہے۔

غیر ملکی خبر رساں ادارے کی رپورٹ کے مطابق ہانگ کانگ کی حکومت نے سیاحوں کی دلچسپی کو بڑھانے اور سیاحت کی صنعت کو فروغ دینے کے لیے ’ہیلو ہانگ کانگ‘ نامی ایک اسکیم کا اعلان کیا ہے۔

اس اسکیم کے تحت یکم مارچ سے سیاح اپنی رجسٹریشن ’ورلڈ آف ونرز‘ نامی ویب سائٹ پر جاکر کرواسکتے ہیں جس کے بعد ان کا نام قرعہ اندازی میں شامل کیا جائے گا۔

کامیاب ہونے والے سیاحوں کو تین مراحل میں ٹکٹس دیے جائیں گے جس میں پہلا نمبر مشرقی ایشیائی ممالک کے سیاحوں کا آئے گا۔

دوسرے مرحلے میں چین کے سیاحوں کو مفت ٹکٹس دیے جائیں گے جب کہ تیسرے اور آخری مرحلے میں دنیا بھر کے سیاحوں کو ٹکٹس دیے جائیں گے۔

رپورٹ کے مطابق اس اسکیم پر دو سال سے کام جاری تھا جب کہ ان پانچ لاکھ ٹکٹس کی کل قیمت 254 ملین امریکی ڈالر بنتی ہے۔

ہانگ کانگ کی تین ایئر لائنز کے ذریعے ٹکٹس کی تقسیم کی جائے گی جس میں کیتھے پیسیفک، ہانگ کانگ ایئر لائنز اور ایچ کے ایکسپریس شامل ہیں۔

واضح رہے کہ عالمی وبا کورونا وائرس کی وجہ سے ہانگ کانگ کی سیاحت کی صنعت کو کافی نقصان پہنچا تھا۔

عالمی وبا سے قبل ہانگ کانگ میں ایک سال میں تقریباً 5 کروڑ 60 لاکھ سیاح آتے تھے لیکن سال 2022 میں یہ تعداد صرف ایک لاکھ تک جاپہنچی تھی۔