سری لنکا کے دارالحکومت کولمبو میں یوم آزادی کے موقع پر ہونے والی مسلح افواج کی پریڈ کے خلاف شہریوں نے احتجاج کیا۔

غیر ملکی میڈیا رپورٹس کے مطابق آج دارالحکومت کولمبو میں نوآبادیاتی حکمرانی سے آزادی کے 75 سال مکمل ہونے پر ایک شاندار فوجی پریڈ منعقد کی گئی تھی جسے شہریوں نے مسترد کر دیا۔

حکومت کی جانب سے اس فوجی پریڈ کی حمایت پر شہریوں نے سخت تنقید کی، شہریوں کا کہنا ہے کہ ملک شدید معاشی بحران کے چنگل میں جکڑا ہوا ہے، حکومت نے اس تقریب پر ملک کا پیسہ ضائع کیا ہے۔

آج ہونے والے اس جشن کی بہت سے بدھ مت اور عیسائی پادریوں نے بھی مذمت کی جنہوں نے کولمبو میں اس تقریب کے بائیکاٹ کا اعلان کیا، جب کہ کارکنوں اور دیگر نے اس بات پر غصے کا اظہار کیا اور کہا کہ وہ اسے پیسے کا ضیاع سمجھتے ہیں۔

ایک کیتھولک پادری سیرل گامنی نے اس سال کی تقریب کو جرم اور بربادی قرار دیا۔

تنقید کے باوجود، مسلح دستوں نے شہر کے مرکزی اسپلینیڈ کے ساتھ پریڈ کی، فوجی سازوسامان کی نمائش کی جبکہ اس تقریب میں ہیلی کاپٹرز اور ہوائی جہازوں نے بھی حصہ لیا.

واضح رہے کہ سری لنکا نے برطانیہ کے نوآبادیاتی حکمرانی کے چنگل سے 1948 میں آزادی حاصل کی تھی۔

سری لنکن صدر خود چند ماہ قبل کفایت شعاری کے اقدامات کے بارے میں متعدد مرتبہ تقریریں کر چکے ہیں۔

سری لنکا گزشتہ سال شدید معاشی بحران کا شکار ہے اور ملک میں مہنگائی عروج پر پہنچ چکی ہے، ملک میں عام سری لنکن شہری اپنی ضروریات کو پوری کرنے کے لیے سخت جدوجہد کر رہا ہے۔