دو مرتبہ آئی سی سی مینز ون ڈے پیلئر آف دی ایئر کا اعزاز پانے والے بابر اعظم نے گزشتہ دو برسوں کے دوران ون ڈے کرکٹ میں تقریباً ہر ممکن کامیابی حاصل کی ہے۔

بابر اعظم حالیہ دنوں میں ون ڈے کرکٹ میں ایک ایسی قوت رہے ہیں جو جولائی 2021 سے ون ڈے پلیئر کی رینکنگ میں نمبر 1 پوزیشن پر براجمان ہیں جب کہ انہیں پچھلے دو سالوں میں ون ڈے پلیئر آف دی ایئر بھی قرار دیا گیا ہے۔

موجودہ وقت میں بھی بابر اعظم نے رنز کا پہاڑ کھڑا کردیا ہے جب کہ ان کی فارم کی بدولت پاکستان ٹیم کا شمار ون ڈے کرکٹ کی بہترین ٹیموں میں ہوتا ہے۔

حال ہی میں قومی ٹیم کے کپتان بابر اعظم نے آئی سی سی ڈیجیٹل میڈٰیا کو انٹرویو دیا جس میں ان کا کہنا تھا کہ ’آئی سی سی ایوارڈ بہت معنی رکھتے ہیں کیونکہ اس میں پاکستان کا نام بھی شامل ہوتا ہے‘۔

بابر اعظم کہتے ہیں کہ ’جب آپ لگن کے ساتھ کچھ حاصل کرتے ہیں تو اس سے آپ کو بہت اعتماد ملتا ہے جب کہ اس کے پیچھے میرے والدین کی دعائیں ہیں، میں ان ایوارڈ کے حصول پر بہت خوش ہوں اور اللہ کا شکر ادا کرتا ہوں‘۔

انٹرویو کے دوران بابر اعظم نے عمران خان کے نقش قدم پر چلتے ہوئے پاکستان کے لیے دوبارہ ورلڈ کپ کی ٹرافی لانے کے عزم کا اظہار کیا۔

انہوں نے کہا کہ ‘میرا عزم ورلڈ کپ کی ٹیم کا حصہ بننا اور ٹورنامنٹ جیتنا ہے، ورلڈ کپ آنے والا ہے اور میری خواہش ہے کہ اچھی کارکردگی کا مظاہرہ کروں تاکہ ہم اسے جیت سکیں‘۔

کپتان کا کہنا تھا کہ ’آپ انفرادی طور پر بہت سی چیزیں کرسکتے ہیں لیکن میرا مقصد ابھی ورلڈ کپ جیتنا ہے‘۔

واضح رہے کہ پاکستان ٹیم نے سال 2022 کے دوران صرف 9 ون ڈے میچز کھیلے ہیں جس میں صرف ایک میں ناکامی کا سامنا کرنا پڑا ہے۔

بابر اعظم کی قیادت میں قومی ٹیم آنے والے مہینوں میں کئی ون ڈے کی میزبانی کرے گی جو ٹیم کو ورلڈ کپ کی تیاری میں مدد فراہم کرے گی۔

یاد رہے کہ ون ڈے ورلڈکپ رواں سال کے آخر میں بھارت میں شیڈول ہے۔