سندھ بورڈ آف فلمزسنسر(ایس بی ایف سی) نے شاہ رخ خان، جان ابراہم اوردیپیکا پاڈوکون کی کاسٹ پر مشتمل بھارتی بلاک بسٹرفلم پٹھان کی غیرقانونی عوامی نمائش روک دی ہے۔

ایس بی ایف سی نے کراچی کے مختلف مقامات بالخصوص ڈیفنس ہاؤسنگ اتھارٹی (DHA) کے علاقوں میں بھارتی فلم کی غیرمجازنمائش کے بارے میں کچھ مقامی اخبارات میں خبر شائع ہونے کے فوراً بعد کارروائی کی۔ خبرکی اشاعت کے بعد ایس بی ایف سی نے تحقیقات کیں اور فلم کی نجی طور پر نمائش کے لیے آن لائن ٹکٹ فروخت کرنے والے کچھ سوشل میڈیا اکاؤنٹس کا پتہ چلایا۔

سندھ بورڈ آف فلمزسنسر(SBFC) کی پالیسیوں کے مطابق صرف ان فلموں کی نجی اور عوامی طور پرنمائش کی اجازت ہے جو سرکاری طورپر ایس بی ایف سی سے منظور شدہ ہوں۔’’کوئی بھی شخص سینماٹوگراف کے ذریعہ کسی فلم کی عوامی یا نجی نمائش کا اہتمام یا انتظام نہیں کرے گا جب تک کہ فلم کو بورڈ کی طرف سے عوامی نمائش کے لئے حسب دستور سرٹیفکیٹ نہ دیا گیا ہو۔‘‘

مذکورہ بالا شق کی روشنی میں  بورڈ نے 3 سال قید کے ساتھ ایک لاکھ روپے جرمانے سمیت متعلقہ قوانین اورتعزیری اقدامات کا حوالہ دیتے ہوئے متنبہ کیا اورفلم کی نمائش کی ذمہ دارکمپنی کو اپنے شوزکو فوری طور پر منسوخ کرنے کی ہدایت کی۔ انتباہ پر عمل کرتے ہوئے ذمہ دارکمپنی فائر ورکس ایونٹس نے فلم پٹھان کی نمائش روک دی۔